ગુજરાતની આ બેઠક પર BJPના ઉમેદવાર સામે લડનારા તમામની ડિપોઝિટ જપ્ત, 1.16 લાખની લીડથી જીત

હર્ષ સંઘવીને 1.32 લાખ વોટ મળ્યા
મજૂરામાંથી ગૃહ રાજ્યમંત્રી હર્ષ સંઘવીએ 1,32,978 વોટથી જંગી જીત મેળવી છે. જ્યારે તેમના પછી બીજા ક્રમે આમ આદમી પાર્ટીના ઉમેદવાર પી.વી.એસ શર્મા છે જેમને 16399 વોટ મળ્યા છે અને કોંગ્રેસના ઉમેદવાર બળવંત જૈનને 9410 વોટ મળ્યા છે. તો BSPના ઉમેદવારના 902 વોટ મળ્યા છે, NOTAને 2297 વોટ મળ્યા છે. આમ હર્ષ સંઘવી 1.16 લાખથી વધુ વોટના માર્જિનથી જીત્યા છે.

મજૂરા બેઠકથી વિપક્ષમાં લડનારા તમામ ઉમેદવારોની ડિપોઝિટ ડૂલ
ત્યારે 2022ની ચૂંટણીમાં પહેલીવાર એવો બનાવ બન્યો છે જેમાં વિજેતા ઉમેદવારની સામે લડનારા તમામ 3 ઉમેદવારોની ડિપોઝિટ પણ ડૂલ થઈ જશે. ચૂંટણી પંચના નિયમ મુજબ, કોઈપણ ઉમેદવારે ડિપોઝિટ બચાવવા માટે કુલ મતદાનના છઠ્ઠા ભાગના વોટ મેળવવા પડે. મજૂરા બેઠક પર 1,61,986 વોટ પડ્યા હતા, ત્યારે ઉમેદવારોએ ડિપોઝિટ બચાવવા ઓછામાં ઓછા 26 હજાર જેટલા વોટ મેળવવા જરૂરી હતા, જોકે બીજા નંબરના ઉમેદવાર પણ 16,399 વોટ જ મેળવી શક્યા છે.