રોકાણકારો ગભરાય નહીં, લોન ચૂકવવા માટે હજુ પૈસા છે, ગ્રોથ પર પણ અમારું ફોકસ: Adani ગ્રુપનું મોટું નિવેદન

બિઝનેસના ગ્રોથ પર ફોકસ
બુધવારે શેરબજારમાં કારોબાર દરમિયાન અદાણી ગ્રુપના ચાર શેરમાં ફરી લોઅર સર્કિટ વાગી ગઈ હતી. પરંતુ અન્ય કંપનીઓના શેર લીલા નિશાન પર ટ્રેડ થતા જોવા મળ્યા હતા. દરમિયાન, કંપનીએ બેલેન્સ શીટને ઠીક કરવાની વાત કરી અને કહેવામાં આવ્યું કે હિન્ડેનબર્ગની અસર હોવા છતાં, તેમનું સંપૂર્ણ ધ્યાન જૂથના વ્યવસાયની ગતિ જાળવી રાખવા પર છે અને જ્યારે બજાર સ્થિર થશે ત્યારે સમીક્ષા કરશે.

લોન ચૂકવવા માટેની અમારી ક્ષમતા
PTI અનુસાર, અદાણી જૂથના મુખ્ય નાણાકીય અધિકારી (CFO) જુગશિન્દર રોબી સિંહે ત્રિમાસિક પરિણામો પછી રોકાણકારો સાથે ચર્ચા કરતી વખતે તેમને ખાતરી આપી હતી. તેમણે કહ્યું, ‘અમારી પાસે પૂરતી રોકડ છે અને અમારી પાસે અમારી લોન ચૂકવવાની ક્ષમતા છે.’ સિંહે વધુમાં જણાવ્યું હતું કે, એકવાર વર્તમાન બજાર સ્થિર થઈ જાય પછી અમે અમારી મૂડી બજાર વ્યૂહરચનાની ફરી સમીક્ષા કરીશું. તેમણે ખાતરી આપી હતી કે અમારું ધ્યાન બજારના ઉતાર-ચઢાવમાં બિઝનેસ ચાલુ રાખવા પર છે.

હિંડનબર્ગની રિપોર્ટ બાદ અદાણીની સંપત્તિ 125 બિલિયન ડોલર સુધી ઘટી
ગત 23 જાન્યુઆરીએ હિંડનબર્ગની રજૂ કરાયેલી રિપોર્ટમાં અદાણી ગ્રુપ પર શેરમાં હેરા-ફેરી કરવા સહિતના કેટલાક આરોપો લગાવાયા હતા. ત્યારપછી ગૌતમ અદાણીની કંપનીઓના શેર એટલા ઘટી ગયા છે કે અત્યાર સુધી ગ્રુપનું માર્કેટ કેપ 125 બિલિયન ડોલર સુધી ઘટી ગયું છે. જો કે, આ અહેવાલ જાહેર થયા પછી, જૂથ દ્વારા જારી કરવામાં આવેલા નિવેદનમાં તેને પાયાવિહોણું જાહેર કરવામાં આવ્યો હતો. પરંતુ અદાણી જૂથ રોકાણકારો પર અહેવાલની પ્રતિકૂળ અસરને ઘટાડવામાં નિષ્ફળ ગયું. આ કારણે ગૌતમ અદાણીની નેટવર્થમાં જોરદાર ઘટાડો થયો હતો અને થોડા જ સમયમાં તે અમીરોની યાદીમાં ચોથા સ્થાનેથી 24માં નંબરે આવી ગયા હતા.