કેજરીવાલના પોલીસ સાથે ઘર્ષણ અને રિક્ષા ભોજન અંગે ભાજપે શું કહ્યું?

ભાજપ પ્રવક્તાએ અરવિંદ કેજરીવાલ પર કર્યા પ્રહાર
જો કે આ અંગે ભાજપના પ્રવક્તા યમલ વ્યાસે જણાવ્યું કે, આ દિલ્હીથી આવતા યાયાવર પક્ષી જેવા નેતા વારંવાર અહીં આવે છે. ખોટા ખોટા દાવાઓ કરે છે. ગુજરાત સરકારને બદનામ કરવાના પ્રયાસો કરે છે. ગુજરાતના લોકોને છેતરવાના પ્રયાસો કરે છે. જો કે ગુજરાતની પ્રજા હોશિયાર છે. તેઓ આવા યાયાવર પક્ષીઓની જેમ ઉતરી આવતા લોકોને વધારે ભાવ નહી આપે. જનતા છે બધુ જ જાણે છે. જેથી તેમની જીતની કોઇ જ શક્યતા નથી. તેઓ ઇચ્છે તેટલા ધમપછાડા કરી શકે છે.

આપ-ભાજપ વચ્ચે પોલીસના દરોડા મુદ્દે શાબ્દિક ટપાટપી
અત્રે ઉલ્લેખનીય છે કે, આમ આદમી પાર્ટી દ્વારા ભાજપ પર આરોપ લગાવાયો હતો કે, ભાજપના ઇશારે ગુજરાત પોલીસ દ્વારા અમારા ગુપ્ત કાર્યાલય પર દરોડા પાડવામાં આવ્યા હતા. ખાખાખોળા પણ કરવામાં આવ્યા હતા. ત્રણેય પોલીસ કર્મચારીઓ નવરંગપુરા પોલીસ સ્ટેશનનાં ડી સ્ટાફના કર્મચારી હતા તેવો દાવો કર્યો હતો. જો કે અમદાવાદ પોલીસે ટ્વીટ કરીને આ દાવાને ફગાવ્યો હતો. ત્યાર બાદ રાજકારણ ગરમાયું હતું. ભાજપે આપ પર વળતા પ્રહારો કર્યા હતા.