ગુજરાતમાં 3 દિવસ ભારે વરસાદની આગાહી, સૌરાષ્ટ્ર-દક્ષિણ ગુજરાતના આ જિલ્લાઓમાં રેડ એલર્ટ

આ જિલ્લાઓમાં ભારે વરસાદની આગાહી
હવામાનની આગાહી મુજબ, સૌરાષ્ટ્રના સુરેન્દ્રનગર, જુનાગઢ, અમરેલી, ભાવનગર, બોટાદ, ગીર સોમનાથ, રાજકોટ, અમરેલી, પોરબંદર, મોરબી, જામનગર સહિતના જિલ્લાઓમાં ભારે વરસાદ પડી શકે છે. બીજી તરફ હવામાન વિભાગ દ્વારા દક્ષિણ ગુજરાતના વલસાડ, દમણ તથા દાદરા અને નગર હવેલી, નવસારી, ડાંગ, ભરૂચ જિલ્લામાં તથા મધ્ય અને ઉત્તર ગુજરાતના સાબરકાંઠા, ગાંધીનગર, અરવલ્લી, ખેડા, અમદાવાદ, પંચમહાલ, દાહોદ, મહિસાગર, છોટા ઉદેપુર, નર્મદા જિલ્લામાં પણ ભારે વરસાદની આગાહી કરવામાં આવી છે. આ સાથે જ માછીમારોને આગામી 5 દિવસ માટે દરિયો ન ખેડવા માટે સૂચના આપવામાં આવી છે.

સૌરાષ્ટ્ર-દ.ગુજરાતમાં રેડ એલર્ટ
હવામાન વિભાગ દ્વારા વલસાડ, દમણ તથા દાદરા અને નગર હવેલી, ગીર સોમનાથ અને જૂનાગઢ જિલ્લામાં ભારે વરસાદની સંભાવનાને પગલે રેડ એલર્ટ આપવામાં આવ્યું છે.

રાજ્યમાં સીઝનનો 76 ટકાથી વધુ વરસાદ
રાજ્યમાં અત્યાર સુધીમાં સીઝનનો 76 ટકાથી વધુ વરસાદ નોંધાઈ ચૂક્યો છે. જેમાં કચ્છ ઝોનમાં 125 ટકાથી વધુ, ઉત્તર ગુજરાતમાં 62 ટકા, મધ્ય-પૂર્વ ગુજરાતમાં 65 ટકા, સૌરાષ્ટ્રમાં 71 ટકા તથા દક્ષિણ ગુજરાતમાં 87 ટકા વરસાદ નોંધાઈ ચૂક્યો છે. રાજ્યમાં આજે કોડિનાર-વીજાપુરમાં અઢી-અઢી ઈંચ વરસાદ નોંધાયો હતો. બીજી તરફ સંતરામપુર, પોરબંદર, કડાણા, મોડાસા અને વડાલીમાં પણ બે-બે ઈંચ વરસાદ પડ્યો હતો.