વડગામમાં 2 કલાકમાં 4 ઈંચ વરસાદ, ખંભાતમાં આખી કાર તણાઈ ગઈ, ગુજરાતમાં વરસાદથી ક્યાં કેવા હાલ?

સવારે 6થી સાંજના 6 સુધીમાં ક્યાં કેવો વરસાદ?

ગુજરાતમાં સવારે 6 વાગ્યાથી સાંજે 6 વાગ્યા સુધીના સમયમાં 128 તાલુકામાં વરસાદ નોંધાયો હતો. જેમાં બનાસકાંઠાના વડગામમાં 4.41 ઈંચ વરસાદ નોંધાયો હતો. જેમાં બપોરે 2થી 4 વાગ્યાના સમયગાળામાં 4 ઈંચ વરસાદ ખાબક્યો હતો. આ બાદ ખેડાના નડિયાદમાં પણ 4 ઈંચ, અમરેલીના બગસરામાં 4 ઈંચ, ખેડાના મહુધામાં પોણા ચાર ઈંચ, દહેગામમાં 3.50 ઈંચ, અમીરગઢમાં 3.35 ઈંચ, મેઘરજમાં 3.31 ઈંચ, સાગબારામાં 3 ઈંચ, હિંમતનગરમાં 2.83 ઈંચ, કડાણામાં 2.76 ઈંચ, કલોલમાં 2.64 ઈંચ વરસાદ નોંધાયો હતો.

બોટાદમાં મેઘરાજાની જોરદાર બેટિંગ

બોટાદના ગઢડા તાલુકાના ઢસાગામે મેઘો મુશળધાર. સાંજના સમયે મેઘરાજાએ જોરદાર બેટિંગ કરી હતી. ગાજવીજ અને હરૂડાટ વીજળી સાથે વરસાદથી ઢસાગામના રોડ રસ્તાઓ પાણી-પાણી થયા હતા. ભારે વરસાદના પગલે વીજ પુરવઠો ખોરવાઈ ગયો હતો. તો રાણપુર તાલુકાના ગ્રામ વિસ્તારોમાં જામ્યો વરસાદી માહોલ. રાણપુર તાલુકાના માલણપુર, બોડીયા, નાગનેશ, દેવળીયા, કિનારા, બરાનીયા સહિતના ગામોમાં ધોધમાર વરસાદ નોંધાયો હતો. ધોધમાર વરસાદ પડવાને કારણે ખેતરો પાણી પાણી થઈ ગયા હતા. લાંબા સમય બાદ સારો વરસાદ થતાં ખેડૂતોમાં આનંદ છવાયો હતો.

હિંમતનગરમાં નેશનલ હાઈવે પર પાણી ભરાયા

સાબરકાંઠામાં વરસાદથી હિંમતનગર શહેર સહિત નેશનલ હાઇવે નંબર 8 પર પાણી ભરાયા હતી. હાઈવે પર 1 ફૂટ જેટલું પાણી ભરાતા વાહન ચાલકો ત્રાહિમામ પોકારી ઉઠ્યા હતા. 

ખંભાતમાં પાણીના પ્રવાહમાં કાર તણાઈ

બીજી તરફ આણંદના ખંભાત શહેરમાં પણ ભારે વરસાદ પડ્યો હતો. મુસળધાર વરસાદથી બફારા વચ્ચે ઠંકપ પ્રસરી હતી. ખંભાતમાં 1 કલાકમાં બે ઈંચ વરસાદથી રસ્તા પર નદીઓ વહેતી હોય તેવા દ્રશ્યો સર્જાયા હતા. સરદાર ટાવર પાસે રોડ પર ઊભેલી કાર વરસાદના પાણીમાં તણાવા લાગી હતી, જેનો વીડિયો સામે આવ્યો છે.

અંબાજીમાં પોલીસ સ્ટેશન પાસે પાણી ભરાયા

બનાસકાંઠાના અંબાજીમાં પણ ભારે વરસાદ પડ્યો હતો. જેના કારણે પોલીસ સ્ટેશન પાસે ઘૂંટણ સમા પાણી ભરાયા હતા. વરસાદને પગલે વાહન ચાલકોને પણ ભારે હેરાનીનો સામનો કરવો પડ્યો હતો. 

દાહોદના ધાનપુરના કંજેટાની પાનમ નદીમાં 6 જેટલા લોકો ફાસયા હતા. ધાનપુર પોલીસ અને રેસ્ક્યૂ ટીમે તમામને બચાવીને બહાર કાઢ્યા હતા.