VFS ગ્લોબલના બે કર્મચારીઓની વધી મુશ્કેલી, 28 લોકોને બનાવટી વિઝા અપોઈન્ટમેન્ટ લેટર આપવાના કેસમાં જામીન ફગાવાયા

આ આખું વિઝા કૌભાંડ 5 જુલાઈના રોજ પ્રકાશમાં આવ્યું હતું. વીએફએસ ગ્લોબલની અમદાવાદ ઓફિસમાં 28 વિઝા એપ્લિકન્ટ્સના બાયોમેટ્રિક એનરોલ થયા હતા પરંતુ ઈમિગ્રેશન, રેફ્યુજીસ એન્ડ સિટિઝનશીપ કેનેડા (IRCC)ની ઓફિસે આ લોકોને વિઝા અપોઈન્ટમેન્ટ લેટર આપ્યા જ નથી, તેવી જાણકારી આપતો ઈ-મેઈલ કેનેડિયન હાઈ કમિશને મોકલ્યો હતો. કંપનીના મેનેજરે નોંધાવેલી FIRમાં આ માહિતી બહાર આવી હતી.ક્રાઈમ બ્રાંચમાં નોંધાયેલી ફરિયાદ પ્રમાણે, પૂર્વ કર્મચારી મેહુલ ભરવાડ અને હાલના બે કર્મચારી સોહિલ દિવાન અને મેલ્વિન ક્રિસ્ટીએ કેટલાક ટ્રાવેલ એજન્ટો સાથે મળીને આ કાંડ કર્યો હતો. તેમણે રજિસ્ટ્રેશનની પ્રક્રિયામાં ચેડા કર્યા હતા અને ખોટી રીતે 28 અરજીકર્તાઓના બાયોમેટ્રિક એનરોલ કરીને તેમને બનાવટી વિઝા અપોઈન્ટમેન્ટ લેટર આપ્યો હતો.

આરોપીઓએ આ કામ માટે દરેક વ્યક્તિ પાસેથી પાંચથી સાત હજાર રૂપિયા પડાવ્યા હતા. મહત્વનું છે કે, કંપનીએ જ્યારે સીસીટીવી ફૂટેજ ચેક કર્યા ત્યારે ખબર પડી કે ઓફિસમાં કોઈ હતું નહીં ત્યારે સોહિલ અને ક્રિસ્ટીએ કેટલાક લોકોના બાયોમેટ્રિક એનરોલ કર્યા હતા. આ માટે તેમણે દરેક વ્યક્તિ પાસેથી પાંચથી સાત હજાર રૂપિયા પડાવ્યા હતા.

VFS ગ્લોબલની ઓફિસ 145 દેશમાં છે કાર્યરત
VFS ગ્લોબલ એ વિઝાનું કામ કરતી સૌથી મોટી કંપની છે. તેની ઓફિસ દુનિયાના 145 દેશોમાં આવેલી છે. તે વિઝાના આઉટસોર્સિંગ તથા ટેક્નોલોજી સર્વિસ સાથે સંકળાયેલી છે. દુનિયાભરની સરકારો અને ડિપ્લોમેટિક મિશન દ્વારા વીએફએસ ગ્લોબલની સર્વિસ લેવામાં આવે છે.