સુરતમાં ગાયનું નકલી ઘી બનાવતી આખી ફેક્ટરી ઝડપાઈ, ડબ્બામાં ભરીને ગીર ગાયના પ્રીમિયમ ઘીના નામે વેચતા

મકાનમાં નકલી ઘી બનાવીને વેચાતું
સુરતના ઓલપાડ પોલીસ સ્ટેશનને બાતમી મળી હતી કે ઈસનપુર ગામની સીમમાં આવેલી રોયલ પાર્ક સોસાયટી ભાગ નંબર 1ના મકાન નંબર 43માં ડુપ્લીકેટ ઘી બનાવવામાં આવી રહ્યું છે અને તેનું ઉત્પાદન કરી પેક કરી બજારમાં વેચવામાં આવી રહ્યું છે. આ બાતમીના આધારે સુરતના ઓલપાડ પોલીસ સ્ટેશનમાં તપાસ હાથ ધરી હતી. ફૂડ એન્ડ ડ્રગ્સ વિભાગના અધિકારીઓ સાથે ઓલપાડ પોલીસ સ્ટેશન દ્વારા દરોડા પાડવામાં આવ્યા હતા. જ્યાંથી ડુપ્લીકેટ ઘી બનાવવામાં વપરાતી સામગ્રી મળી આવી હતી. ડુપ્લીકેટ ઘી પેક કરેલી જુદી જુદી બોટલો અને કેન પણ મળી આવ્યા છે. ફૂડ એન્ડ ડ્રગ્સ વિભાગની ટીમે સેમ્પલ લઈને લેબોરેટરીમાં મોકલી આપ્યા છે.

સોયાબીન,સૂર્યમુખી તેલ અને ડાલડા ઘી મિક્સ કરતા
ઓલપાડ પોલીસ સ્ટેશનના પોલીસ ઈન્સ્પેક્ટર વી.કે.પટેલે જણાવ્યું હતું કે, દરોડા દરમિયાન સોયાબીન તેલ, સૂર્યમુખી તેલ, ડાલડા ઘી અને પેકિંગ સામગ્રી જપ્ત કરવામાં આવી છે. ગીર ગાય પ્રીમિયમ ક્વોલિટી ગાય ઘી બ્રાન્ડ, પેકિંગ બોક્સ અને બોટલ, 100 ગ્રામ, 200 ગ્રામ, 500 ગ્રામ અને 1 લીટરના પેકેટ બનાવી સુરતના વિવિધ વિસ્તારોમાં વેચતી હતી. ઘી બનાવવા માટે, આ લોકો સોયાબીન તેલ અને સૂર્યમુખી તેલ અને ડાલડા ઘી ભેળવતા હતા અને તેને એક મોટા તપેલામાં ભરીને ભઠ્ઠી પર 1 કલાક સુધી ગરમ કરતા હતા, જેમાં એસેન્સ ઉમેરવામાં આવતું હતું, જેના કારણે તેમાં ઘી જેવી સુગંધ આવતી હતી અને પછી ઠંડું થતા તે પેક કરવામાં આવતું.

આરોપી અગાઉ પણ નકલી ઘી બનાવતા પકડાયો હતો
મકાનમાલિક વિશાલભાઈ સતીષભાઈ શાહ તેના અન્ય બે સાથીદારો સાથે ડુપ્લીકેટ ઘીનું કારખાનું ચલાવતા હતા. ઈન્સ્પેક્ટર વી.કે.પટેલે જણાવ્યું હતું કે, ડુપ્લીકેટ ઘી બનાવનાર વિશાલભાઈ શાહ અગાઉ પણ સુરતના કામરેજ પોલીસ સ્ટેશન વિસ્તાર હેઠળના માકડા ગામમાં ડુપ્લીકેટ ઘી બનાવવાના કેસમાં ઝડપાઈ ચૂક્યો છે.

સુરત ગ્રામ્યના ઓલપાડ વિસ્તારમાં નકલી ગાયના ઘી બનાવવાની ફેક્ટરીનો પર્દાફાશ કરીને પોલીસે અનેક લોકોના આરોગ્ય સાથે ચેડા થતા બચાવ્યા છે. સુરત ગ્રામ્ય હોય કે સુરત શહેર, ભેળસેળ માફિયાઓ ખાદ્યપદાર્થોમાં ભેળસેળ કરીને લોકોના આરોગ્ય સાથે ચેડા કરી રહ્યા છે, તેવો ઘટસ્ફોટ ભૂતકાળમાં સુરત શહેરમાંથી પણ થયો છે.