સલમાન રશ્દી પર જીવલેણ હુમલો, આંખો અને ગળામાં છરીના 20 ઘા મારી દીધા

ઘટના ઘટી ત્યારે ઇનટરવ્યુમાં હાજર એક પ્રત્યક્ષદર્શી ચાર્લ્સ સેવેનરે જણાવ્યું કે, સ્ટેજ પર અચાનક દોડીને એક વ્યક્તિ ઘસી આવ્યો. રશ્દીના ગળાના ભાગે છરી વડે હુમલો કરી દીધો હતો હાજર લોકો કંઈક સમજી શકે કે તેને અટકાવે તે પહેલા તો તે વ્યક્તિએ ખુબ જ જનુનથી રશ્દીને 20 કરતા પણ વધારે છરીના ઘા મારી દીધા હતા. 20 સેકન્ડની અંદર તેમના ગળા પર લગભગ 10-15 વખત છરીના ઘા મારી દીધા હતા.

ઘટના નજરે જોનારા એક વ્યક્તિએ જણાવ્યું કે, હુમલાખોર કાળાં કપડાં પહેરીને આવ્યો હતો. તેણે કાળા કપડા ઉપરાંત માસ્ક પણ પહેરેલું હતું. ઘટના બાદ રશ્દી સ્ટેજ પર જ ઢળી પડ્યાં હતા. તત્કાલ એક ડૉક્ટરે તેમને પ્રાથમિક સારવાર આપી હતી અને પછી એર એમ્બ્યુલન્સ દ્વારા તેમને હોસ્પિટલ લઈ જવામાં આવ્યા હતા.

સ્થળ પર હાજર પોલીસ અધિકારીઓએ જણાવ્યું કે, હુમલા દરમિયાન લોકોએ આરોપીને ઝડપી લીધો હતો. તેને માર મારવામાં આવ્યો હતો અને ત્યાર બાદ પોલીસને સોંપી દીધો હતો. જો કે દરમિયાન આરોપીએ ભાગવાનો પણ પ્રયાસ કર્યો હતો. પરંતુ લોકોએ ફરી તેને પકડી લીધો હતો અને પોલીસના હવાલે કરી દીધો હતો.