રાજકોટથી વિજય રૂપાણી અને મહેસાણાથી નીતિન પટેલ ફાઇનલ, ભાવનગરમાં મનસુખ- ભારતી વચ્ચે રસાકસી

લોકસભા ચૂંટણી જેમ જેમ નજીક આવતી જઇ રહી છે તેમ તેમ રાજકીય હસ્તીઓમાં ગણગણાટ અને સળવળાટ વધી રહ્યો છે. લોકસભા માટે કયા મુરતીયાઓના નામ જાહેર થાય છે તેની પ્રજાને પણ આતુરતા હોય છે. અનેક ઉમેદવારો હાલ ખાંડા ખખડાવી રહ્યા છે. જો કે તેમાં સૌથી મહત્વના ગણાતા સૌરાષ્ટ્રમાં ભાજપ જુના જોગીઓના શરણે જાય તેવી શક્યતાઓ જોવાઇ રહી છે. પૂર્વ મુખ્યમંત્રી વિજય રૂપાણીને રાજકોટ અથવા તો પોરબંદરથી ચૂંટણી લડાવવામાં આવે તેવી શક્યતાઓ વ્યક્ત કરાઇ રહી છે. તો બીજી તરફ ઉત્તર ગુજરાતમાં અસંતોષ ખાળવા માટે નીતિન પટેલને મહેસાણા સીટ પરથી ઉતારવામાં આવે તેવી શક્યતાઓ મહત્તમ છે.