રાજકોટમાં માતાને ભગાડી જનાર પ્રેમી સાથે દીકરાએ 5 વર્ષ બાદ લીધો ભયાનક બદલો

સરાજાહેર માતાના પ્રેમીની દીકરાએ કરી હત્યા
વિગતો મુજબ, સોમવારે બપોરે મહાકાળી ચોક નજીક સલીમ ઓડિયા નામના યુવક પર બે શખ્સોએ જાહેરમાં છરી વડે હુમલો કર્યો હતો. જેમાં છાતીના ભાગે છરીના ઘા વાગતા સલીમનું સ્થળ પર જ મોત નિપજયું હતું. જોકે સ્થાનિકો ત્યાં આવીને આ અંગે પોલીસને જાણ કરી હતી. પરંતુ ત્યાં સુધીમાં હુમલો કરનારા બંને શખ્સો ફરાર થઈ ગયા હતા. જેથી ક્રાઈમ બ્રાન્ચના અધિકારીઓ સ્થળ પર દોડી આવ્યા હતા.

2018માં મૃતક આરોપીની માતાને ભગાડી ગયો હતો
પોલીસની પ્રાથમિક તપાસમાં મૃતક સલીમના મહિલા સાથે આડાસંબંધ હોવાથી 2018માં તેને ભગાડી ગયો હતો. તે વાતનો જ ખાર રાખીને મહિલાના પુત્ર અને કાકાએ સલીમને મોતને ઘાટ ઉતારી દીધો હોવાનું જાણવા મળી રહ્યું છે. હાલમાં પોલીસ હત્યાના બનાવના સીસીટીવી ફૂટેજ કબજે કરવાની કાર્યવાહી હાથ ધરી છે. ત્યારે આબીદ નામના એક શખ્સને ઝડપી લેવામાં આવ્યો છે અને અન્ય ફરાર આરોપીને પકડવા માટે અલગ અલગ ટીમ બનાવી તપાસ શરૂ કરી છે.