ગુજરાત માટે આગામી 24 કલાક 'ભારે': દ્વારકાથી લઈને ડાંગ સુધી વીજળીના કડાકા સાથે મેઘો તૂટી પડશે, હવામાન વિભાગે શું કહ્યું?

Rain Forecast in Gujarat: ગુજરાતમાં ભલે ચોમાસું તેની નિર્ધારિત તારીખ કરતાં ચાર દિવસ વહેલું આવ્યું હતું, પરંતુ લાંબા સમયથી તે દક્ષિણ ગુજરાતના નવસારીની નજીક અટકી જતાં સમગ્ર રાજ્યમાં ચિંતાનું મોજું ફેલાઈ ગયું હતું. વરસાદ ન આવતા લોકો ભારે ભેજના કારણે બફારા અને ઉકળાટથી ત્રસ્ટ થઈ ઊઠ્યા હતા. મેહુલિયાના આગમનની આતુરતાપૂર્વક રાહ જોવાતી હતી. ઠેર ઠેર ખેડૂતોમાં વાવણીલાયક વરસાદ ન થતાં ભારે ચિંતા જોવા મળી હતી. જોકે, આ તમામ બાબતોનું સાટું વાળતા હોય તેમ મેઘરાજાએ ગઈકાલે ગુજરાતભરમાં ધમાકેદાર એન્ટ્રી કરી છે. રાજ્યના 130 તાલુકામાં સાડા ત્રણ ઈંચ સુધીનો વરસાદ વરસતાં લોકો ખુશખુશાલ થઈ ગયા છે.