માનહાનિ કેસમાં સુરત કોર્ટની 2 વર્ષની સજા વિરુદ્ધ રાહુલ ગાંધીએ હાઈકોર્ટના દ્વાર ખખડાવ્યા

2019ની લોકસભા ચૂંટણી દરમિયાન કર્ણાટકમાં એક રેલી દરમિયાન રાહુલ ગાંધીએ ‘મોદી સરનેમ’ને લઈને નિવેદન આપ્યું હતું. આ નિવેદનને લઈને ભાજપના ધારાસભ્ય પૂર્ણેશ મોદીએ રાહુલ વિરુદ્ધ માનહાનિનો કેસ દાખલ કર્યો હતો. ચાર વર્ષ બાદ 23 માર્ચે સુરતની નીચલી અદાલતે રાહુલને દોષિત ઠેરવી બે વર્ષની જેલની સજા ફટકારી હતી.

રાહુલના વકીલે કોર્ટમાં કહ્યું હતું કે, નીચલી કોર્ટમાં કેસની સુનાવણી યોગ્ય નહોતી. આ કેસમાં મહત્તમ સજાની જરૂર નથી. રાહુલ વતી કહેવામાં આવ્યું હતું કે જો 23 માર્ચના નીચલી કોર્ટના નિર્ણયને સસ્પેન્ડ અને મોકૂફ નહીં રાખવામાં આવે તો તેનાથી તેમની પ્રતિષ્ઠાને નુકસાન થશે.

શું છે મોદી અટકનો વિવાદ?
રાહુલ ગાંધીએ 13 એપ્રિલ 2019ના રોજ કર્ણાટકમાં એક ચૂંટણી રેલીમાં કહ્યું હતું કે નીરવ મોદી, લલિત મોદી, નરેન્દ્ર મોદીની અટક કેમ સામાન્ય છે? બધા ચોરની અટક મોદી કેમ છે? આ પછી બીજેપી ધારાસભ્ય પૂર્ણેશે માનહાનિનો કેસ દાખલ કરીને આરોપ લગાવ્યો કે 2019માં એક ચૂંટણી રેલીને સંબોધિત કરતી વખતે રાહુલે કથિત રીતે આખા મોદી સમુદાયને બદનામ કરી કહ્યું કે બધા ચોરોની અટક મોદી કેમ છે? તેમના નિવેદનથી અમારી અને સમાજની ભાવનાઓને ઠેસ પહોંચી છે. તેમની અરજી પર સુનાવણી કર્યા બાદ કોર્ટે રાહુલ ગાંધીને આઈપીસીની કલમ 499 અને 500 હેઠળ દોષિત ઠેરવ્યા હતા.

રાહુલે કરી હતી બે અરજીઓ
રાહુલ ગાંધીને સજા ફટકારવામાં આવ્યા બાદ તેમણે 3 અપ્રિલે સુરત કોર્ટમાં એક મુખ્ય અરજી કરી હતી અને બે અરજીઓ કરી હતી. મુખ્ય અરજીમાં નીચલી અદાલતના નિર્ણયને પડકારવામાં આવ્યો હતો, જ્યારે બે અરજીઓમાંથી પહેલી અરજી દોષિત ઠેરવવા પર સ્ટે મૂકવાની હતી, જ્યારે બીજી અરજી સજા પર સ્ટેને લગતી હતી.

24 માર્ચે ગુમાવી લોકસભાની સદસ્યતા
કોંગ્રેસના પૂર્વ અધ્યક્ષ રાહુલ ગાંધીની લોકસભાની સદસ્યતા 24 માર્ચે રદ કરવામાં આવી હતી. લોકસભા સચિવાલય દ્વારા આ સંદર્ભે એક જાહેરનામું બહાર પાડવામાં આવ્યું હતું. મોદી અટક સંબંધિત માનહાનિના કેસમાં  સુરતની કોર્ટે રાહુલને બે વર્ષની જેલની સજા ફટકારી હતી. તેના જવાબમાં તેણે ટ્વિટર પર લખ્યું, ‘હું ભારતના અવાજ માટે લડી રહ્યો છું. હું કોઈપણ કિંમત ચૂકવવા તૈયાર છું.

11 એપ્રિલે કોર્ટેમાં પૂર્ણેશ મોદીએ આપ્યો હતો જવાબ
આ સાથે જ કોર્ટે અરજદાર પૂર્ણેશ મોદીને નોટિસ પાઠવીને કોર્ટ સમક્ષ પોતાનો જવાબ રજૂ કરવા જણાવ્યું હતું. અરજદારે 2 દિવસ પહેલા એટલે કે 11 એપ્રિલે પોતાનો જવાબ રજૂ કર્યો હતો. જવાબ રજૂ કરતાં પૂર્ણેશે કહ્યું હતું કે જીત કે હારની વાત નથી. તેના બદલે તે એક સામાજિક લડાઈ છે. ફરિયાદી વતી એડવોકેટ કેતન રેશમવાલાએ જવાબ રજૂ કર્યો હતો.