રાધનપુરમાં 1 કલાકમાં 3.5 ઈંચ વરસાદથી જળબંબાકારની સ્થિતિ, બજારોમાં પાણી ભરાયા

રાધનપુરમાં વરસાદના કારણે રસ્તા પાણીમાં ગરકાવ
રાધનપુરમાં ભારે વરસાદને પગલે શહેરના માર્ગો પર પાણી ભરાતા વાહન ચાલકોને ભારે હાલાકીનો સામનો કરવો પડ્યો હતો. ઘણા વાહનો રસ્તામાં બંધ થઈ જતા લોકોએ ધક્કા મારીને તેને લઈ જવા પડ્યા હતા. આખું શહેર થોડા જ સમયમાં પાણી-પાણી થઈ ગયું હતું.

અમદાવાદમાં પણ અનેક વિસ્તારોમાં વરસાદ
બીજી તરફ આજે અમદાવાદ શહેરમાં પણ બપોર બાદ અનેક વિસ્તારોમાં મેઘરાજા મહેરબાન થયા હતા. શહેરના સેટેલાઈટ, બોપલ, વસ્ત્રાપુર, પાલડી, વાસણા, સરખેજ, ઘાટલોડિયા, નવરંગપુરા સહિતના વિસ્તારોમાં ભારે પવન સાથે ધોધમાર વરસાદ વરસ્યો હતો. જેના કારણે ઘણા નીચાણવાળા વિસ્તારોમાં પાણી ભરાવાની સમસ્યા સર્જાઈ હતી.

ગુજરાતમાં સીઝનનો 81 ટકાથી વધુ વરસાદ
ગુજરાતમાં ગઈકાલથી આજે સવારે 6 વાગ્યા સુધીમાં તમામ 33 જિલ્લાના 198 તાલુકાઓમાં વરસાદ નોંધાયો હતો. જેમાં કચ્છના માંડવીમાં 3 ઈંચ જેટલો વરસાદ પડ્યો હતો. ગુજરાતમાં અત્યાર સુધી સીઝનનો 81 ટકાથી વધુ વરસાદ પડી ચૂક્યો છે. કચ્છમાં સીઝનનો 132 ટકા, ઉત્તર ગુજરાતમાં 68 ટકા, મધ્ય-પૂર્વ ગુજરાતમાં 70 ટકા, સૌરાષ્ટ્રમાં 77 ટકા તથા દક્ષિણ ગુજરાતમાં 91 ટકા વરસાદ પડી ચૂક્યો છે.

(વિથ ઈનપુટ: વિપિન પ્રજાપતિ)