થરાદમાં 17 મહિનાથી રોડના અધૂરા કામ પૂરા ન થતા 9 વિભાગને નાયબ કલેક્ટરે નોટિસ પાઠવી

થરાદ હાઇવે વિસ્તારના રહીશોએ અધુરા રોડની કામગીરીથી પડતી હાલાકી મુદ્દે નાયબ કાર્યપાલક ઇજનેર નેશનલ હાઇવે સહિત નવ વિભાગ સામે કાયદેસરની કાર્યવાહી કરવાની આવેદન આપી માંગણી કરી હતી. નાયબ કલેક્ટર દ્વારા તમામને ત્રાસદાયક બાબત દૂર કરવાનો હુકમ કરતો આદેશ કરાયો હતો. સાથે સાથે હુકમનો અમલ શા માટે ન કરવો તેનો ખુલાસો કરવા પણ જણાવાયું હતું.

થરાદ નાયબ કલેક્ટરે ત્રાસદાયક બાબત દુર કરવા બાબતે કરેલા હુકમમાં જણાવ્યું હતું કે, વાવ-સાંચોર નેશનલ હાઇવે ઉપર 17 મહિનાથી કામગીરી અધૂરી પડી છે. બંને બાજુ ખોદીને એ જ પરિસ્થિતિમાં મૂકવામાં આવી છે. આ રોડ ઉપર પસાર થતાં લોકોના મનમાં અકસ્માતોનો સતત ભય ઉભો કર્યો છે. આથી તમારા દ્વારા આવી બેદરકારી ભરી કામગીરી કરી જાહેર ત્રાસદાયક બાબત ઉભી કરી છે અને આવી અડચણ અત્યારે ચાલુ છે. ક્રિમિનલ પ્રોસિજર કોડની કલમ 133 મુજબ 18 ઓગષ્ટ સુધીમાં ત્રાસદાયક બાબત દૂર કરવા તેમના ન્યાયાલયમાં રૂબરૂ હાજર થવાનો હુકમ કર્યો હતો. હુકમનો શા માટે અમલ ન કરવો જોઈએ તેનું કારણ પણ બતાવવા કહ્યું હતું. આમ આગામી 18 ઓગસ્ટના રોજ યોજનારી સુનાવણીમાં સરકારના નવ વિભાગના અધિકારીઓ નાયબ કલેક્ટર સમક્ષ હાજર રહેશે અને 17 માસથી રોડ કામ કેમ ચાલે છે તેનો ખુલાસો કરી પોતાનો બચાવ રજૂ કરશે.