હિંમતનગરમાં ચાલુ પંખા સાથે છત પડી, ભર ઊંઘમાં રહેલા માતા-પુત્રીના દબાઈ જતા કરુણ મોત

રાત્રિના સમયે સૂતેલા માતા-દીકરી પર છત પડી
વિગતો મુજબ, હિંમતનગરના પોલો ગ્રાઉન્ડના મુસ્તફા મસ્જીદ રોડ પર આવેલી સર્વોદય સોસાયટી સામેના ઘરમાં સોમવારે રાત્રે માતા-પુત્રી ઊંઘી રહ્યા હતા. બંને રાત્રીના સમયે ભર ઊંઘમાં હતા એવામાં જ ચાલુ પંખા સાથે ઘરની છત તેમના પર ધરાશાયી થઈ હતી. ઘટનામાં બંને જણા ગંભીર રીતે ઈજાગ્રસ્ત થઈ ગયા હતા.

હોસ્પિટલમાં પહોંચતા તબીબે મૃત જાહેર કર્યા
ઘટનાની જાણ થતા જ આસપાસના લોકો દોડી આવ્યા હતા અને ઈમરજન્સી સેવા 108 એમ્બ્યુલન્સને ફોન કરીને જાણ કરી હતી. બંને માતા-દીકરીને પહેલા ખાનગી હોસ્પિટલમાં સારવાર માટે લઈ જવાયા હતા, જોકે સ્થિતિ બગડતા સિવિલ હોસ્પિટલ લઈ જવાયા હતા. જ્યાં ફરજ પરના તબીબે બંનેને મૃત જાહેર કર્યા હતા. સમગ્ર મામલે હવે બી-ડિવિઝન પોલીસને જાણ કરાતા પોલીસે કાર્યવાહી હાથ ધરી છે.