દ્વારકાથી 280 કિમી દૂર બિપોરજોય વાવાઝોડાની છેક મોરબીમાં અસર, ભારે પવને લીધો મહિલાનો જીવ!

સીરામીક ફેક્ટરીમાં કામ કરતી મહિલાનું મોત
મોરબીમાં રંગપર બેલા રોડ પર આવેલ સીરામીક ફેકટરીમાં ચીમની માથે પડતા એક મહિલાનું મોત નિપજ્યું હોવાની વિગતો સામે આવી રહી છે. કોયો સીરામીકમાં કામ કરતી મૂળ મધ્ય પ્રદેશની મહિલા રામકન્યાના માથા પર સ્પ્રેડાયરની ચીમની પડી હતી. જેના કારણે માથામાં ગંભીર ઈજાઓ પહોંચતા તેનું મોત નિપજ્યું હતું. હાલમાં વધુ પડતા પવનના કારણે ચીમની પડી હોવાનું પ્રાથમિક અનુમાન લગાવવામાં આવી રહ્યું છે. બિપોરજોય વાવાઝોડું હાલ દ્વારકાથી 280 કિલોમીટર અને મોરબીથી અંદાજે 500થી વધુ કિલોમીટર દૂર છે. જોકે તેમ છતાં મોરબીમાં ભારે પવન ફૂંકાઈ રહ્યો છે અને એવામાં મહિલાએ પોતાનો જીવ ગુમાવવો પડ્યો છે. વાવાઝોડાની અસરના કારણે આ બે દિવસમાં પાંચમું મોત છે.

રાજ્યમાં અત્યાર સુધીમાં 5 લોકોના મોત
આ પહેલા ગઈકાલે કચ્છમાં ભારે પવનના કારણે દિવાલ ધરાશાયી થતા ત્યાં રમી રહેલા બાળકો પર પડી હતી. જેમાં 3 જેટલા બાળકો દટાઈ ગયા હતા અને બે બાળકોના મોત નિપજ્યા હતા. જ્યારે એક બાળકને હોસ્પિટલમાં સારવાર માટે ખસેડવામાં આવ્યો હતો. બીજી તરફ જસદણ પાસે બાઈક પર ઝાડ પડતા પરિણીતાનું મોત નિપજ્યું હતું, તો પોરબંદરમાં મોડી રાત્રે જર્જરીત મકાન ધરાશાયી થતા યુવકનું કાટમાળમાં દબાઈ જતા મોત થયું હતું.