અમદાવાદમાં તમારા જોખમે બહાર નીકળજો, તંત્રની બેદરકારીના કારણે ભુવામાં સમાઈ ગયો વ્યક્તિ

શહેરમાં જમાલપુર વિસ્તારનો એક વીડિયો સામે આવ્યો છે. કાચની મસ્જિદ પાસે રોડ પર મોટો ભૂવો પડ્યો હતો. જેમાં વરસાદ બાદ પાણી ભરાઈ જતા ખાડો દેખાતો નહોતો. તંત્ર દ્વારા JCB લઈને કામગીરી તો શરૂ કરાઈ પરંતુ ખાડાની આજુબાજુમાં કોઈ બેરિકેડ્સ પણ મૂકવામાં આવ્યા નહોતા. એવામાં ત્યાંથી નીકળતો વ્યક્તિ સીધો પાણી ભરેલા ખાડામાં પડી જાય છે. જોકે સદનસીબે તરતા આવડતું હોવાના કારણે તે બહાર નીકળી જાય છે, પરંતુ આ ખાડામાં તંત્ર કોઈનો જીવ જાય તેની રાહ જોતું હોય તેમ ગંભીર બેદરકારી સામે આવી રહી છે. સમગ્ર ઘટના સીસીટીવી કેમેરામાં કેદ થઈ ગઈ હતી.