અમદાવાદમાં કુતરાથી ડરી યુવાન ઘરમાં ઘૂસી ગયો તો લોકોએ ચોર સમજી પતાવી દીધો

અમદાવાદઃ અમદાવાદના છેવાડામાં આવેલા સનાથલ ખાતે એક વિચિત્ર ઘટના બની છે. નેપાળથી અહીં અમદાવાદમાં કમાવા આવેલા એક યુવાનને જીવ ગુમાવવાનો વારો આવ્યો છે. થયું એવું હતું કે તે સનાથલ ચોકડી પાસેના જીવણપુરા ગામમાંથી જઈ રહ્યો હતો. આ નેપાળી યુવક પાછળ રખડતા કુતરા પડ્યા ત્યારે તે ગભરાઈને એક મકાનમાં છૂપાઈ ગયો. લોકોએ સમજ્યું કે આ ચોર છે અને જાણે પોતે જ ન્યાયકર્તાઓ હોય તે રીતે આ યુવકને અધમુઓ થઈ જાય તેવો માર્યો. એટલો માર્યો કે આખરે તેનું મોત થઈ ગયું. યુવક મૃત્યુ પામતા લોકોએ તેની લાશ કેનાલ પાસે ફેંકી દીધી. જોકે સત્ય છુપાતું નથી. હવે પોલીસ આ ગામમાં યુવકની હત્યામાં કોણ કોણ શામેલ છે તેની તપાસ કરી રહી છે.