કિરણ પટેલે ઘોડાસરમાં કરોડોનો બંગલો પચાવી પાડ્યો હતો, 5 વર્ષથી પરેશાન મકાન માલિક પોલીસ પાસે પહોંચ્યા

ઘોડાસરનો બંગલો પચાવી પાડ્યો
કિરણ પટેલ હાલ ઘોડાસરના જે પ્રેસ્ટિજ બંગલોમાં રહે છે તેના મૂળ માલિકનું નામ વનરાજ ચૌધરી છે. છેલ્લા પાંચ વર્ષથી કિરણ પટેલ અહીં રહે છે અને ભાડું ન ચૂકવતો હોવાનો આક્ષેપ વનરાજ ચૌધરીએ કર્યો છે. જ્યારે ભાડા અને મકાન ખાલી કરવા અંગે કહ્યું તો કિરણ પટેલે રાજકીય વગના નામે તેમને ધમકીઓ આપી હતી.

મુંબઈથી અમદાવાદ પહોંચ્યા બંગલાના માલિક
જમ્મુ-કાશ્મીરમાં નકલી PMO અધિકારી બનીને ફરતા કિરણ પટેલનો ભેદ ખુલતા જ પ્રેસ્ટિજ બંગલોના માલિક વનરાજ ચૌધરી પણ ચોંક્યા હતા અને મુંબઈથી અમદાવાદ આવી પહોંચ્યા હતા અને પોલીસને સમગ્ર બાબત અંગે જાણ કરી હતી. આ મામલે હવે આજે તેઓ પોલીસ ફરિયાદ નોંધાવશે.

પૂર્વ મંત્રીના ભાઈનો પણ બંગલો પચાવવાનો કર્યો હતો પ્રયાસ
નોંધનીય છે કે, બીજી તરફ થલતેજમાં પૂર્વ મંત્રીના ભાઈ જગદીશ ચાવડાનો બંગલો પચાવવાના પ્રયાસનો ગુનો ક્રાઈમ બ્રાન્ચ દ્વારા ગઈકાલે જ નોંધાયો છે. 7 મહિના પહેલા જ આ અંગે જગદીશ ચાવડાએ પોલીસને અરજી કરી હતી કે કિરણ પટેલ તેમનો કરોડોનો બંગલો પચાવી પાડવાનો પ્રયાસ કર્યો હતો. જે મામલે હવે ક્રાઈમ બ્રાન્ચે ગુનો નોંધ્યો છે.