ખેડા સિરપ કાંડ: 3 આરોપીઓના 10 દિવસના રિમાન્ડ મંજૂર, વડોદરાના પણ બે શખ્સની પણ સંડોવણી સામે આવી

નડિયાદ કોર્ટમાં આરોપીઓને રજૂ કરાયા હતા

ખેડાના બિલોદરામાં સિરપ કાંડમાં પોલીસે 3 આરોપીઓને પકડીને આજે નડિયાદની ગ્રામ્ય કોર્ટમાં રજૂ કર્યા હતા. આરોપીઓને કોર્ટમાં રજૂ કરીને પોલીસે 14 દિવસના રિમાન્ડની માગણી કરી હતી, જોકે આરોપીઓના 11 ડિસેમ્બર સુધીના રિમાન્ડ કોર્ટે મંજૂર કર્યા હતા. આ કેસની સમગ્ર તપાસ માટે સરકારે SOG PI ડી.એન ચુડાસનાના નેતૃત્વમાં SITની રચના કરી છે.

વડોદરાના બે શખ્સના નામ ખૂલ્યા

નડિયાદના બિલોદરા અને બગડુગામે 5 લોકોનાં મોતની ગંભીર ઘટનામાં આખરે ગત મોડી સાંજે ફરિયાદ દાખલ કરવામાં આવી હતી. આ ફરિયાદમાં પ્રથમ નંબર પર આરોપી તરીકે યોગેશ પારુમલ સિંધી, નારાયણ ઉર્ફે કિશોર સોઢા (ભાજપ પૂર્વ કોષાધ્યક્ષ), ઈશ્વર સોઢા, વડોદરાનો નીતિન કોટવાણી અને ભાવેશ સેવકાણી વિરુદ્ધ ગુનો નોંધાયા છે. પોલીસે આરોપીઓ વિરુદ્ધ બેદરકારી દાખવવા અને સાઅપરાધ માનવ વધની કલમો ઉમેરી છે.

આરોપીઓએ નદીમાં ઠાલવી દીધી હતી બોટલો

ઉલ્લેખનીય છે કે વડોદરાનો નીતિન કોટવાણી કેમિકલના વેપલામાં કુખ્યાત છે. અગાઉ નકલી સેનેટાઈઝર સહિતના પ્રકરણોમાં પણ તેની ધરપકડ કરાઈ હતી. આ પાંચેય આરોપીઓ સામે આઇપીસી કલમ 304, 308, 328,465, 468, 471, 274,275, 276, 34, 201 તેમ જ પ્રોહિબિશન એક્ટ 65 (અ) મુજબ ગુનો નોંધાયો છે. મહત્વની બાબત છે કે, પોલીસે પાંચ સામે ગુના નોંધ્યા છે, જેમાં ત્રણ આરોપીને અગાઉથી જ રાઉન્ડઅપ કરેલા છે, જોકે બે આરોપીઓ હજી ફરાર છે. રાઉન્ડ અપ કરેલા ત્રણ આરોપીએ પોલીસની પૂછપરછમાં જણાવ્યું હતું કે, બિલોદરા ગામમાં શંકાસ્પદ મોત થતાં અમે બાકી વધેલી બોટલો નદીના પાણીમાં ઠાલવી દીધી હતી. આ ઉપરાંત અન્ય બોટલોને પણ વીણા ગામની સીમમાં આવેલા ગોડાઉન નજીક બાળી દીધી હતી.

(ઈનપુટ: હેતાલી શાહ, ખેડા)