ખેડામાં શેઢી નદીના કાંઠેથી હજુ મળી રહી છે 6 લોકોના જીવ લેનારી આયુર્વેદિક સિરપ, યુવકે પી લેતા દોડધામ મચી

નદીમાંથી મળેલી બોટલ આપઘાત કરવા પી લીધી

વિગતો મુજબ, ખેડામાં સોમવારે બિલોદરાના હેમંત ચૌહાણ નામનો શખ્સ તેના કૌટુંબિક ઝઘડાથી કંટાળીને શેઢી નદીના કિનારે બેસી ગયો હતો. અહીં તેને આયુર્વેદિક સિરપની બોટલ મળી આવતા તેણે આપઘાત કરવા માટે તે પી લીધી હતી. જેથી પરિવારજનો તેને તાત્કાલિક 108 મારફતે નડિયાદ સિવિલ હોસ્પિટલમાં લઈ ગયા હતા. યુવકની તબિયત લથડતાં તેને સારવાર માટે નડિયાદ સિવિલ હોસ્પિટલમાં દાખલ કરવામાં આવ્યો હતો. યુવકને છાતીમાં દુખાવો, માથાનો દુખાવો, આંખોમાં બળતરા જેવા લક્ષણો જોવા મળ્યા હતા.

યુવકને સારવાર માટે હોસ્પિટલ ખસેડાયો

સિવિલ હોસ્પિટલના ઇમરજન્સી સ્ટાફ દ્વારા તેમને તાત્કાલિક સારવાર આપવામાં આવી હતી. જોકે હવે તે સ્થિર છે. આ ઘટનાની જાણ થતાં જ ખેડા પોલીસ તાત્કાલિક એક્શનમાં આવી ગઈ હતી અને મોડી રાત્રે ખેડા ડીએસપી રાજેશ ગઢિયા અને ડીએસપી વી.આર.બાજપાઈ તાત્કાલિક બિલોદરા નજીક શેઢી નદીના કિનારે પહોંચી ગયા હતા. સવાર સુધી નડિયાદ ફાયર બ્રિગેડની ટીમે શેઢી નદીમાં શોધખોળ હાથ ધરી હતી.

(હેતાલી શાહ, ખેડા)