ખેડામાં 18 વર્ષીય યુવતીની જાહેરમાં હત્યા, આરોપીએ પાંચ વાર ચપ્પાના ઘા ઝીંકી દીધા હતા

મહિલાઓની સુરક્ષા સામે પ્રશ્નો
એક બાજુ ગુજરાતમાં મહિલા સુરક્ષિત છે તેવ દાવા કરવામાં આવે છે ત્યારે બીજી બાજુ બુધવારે માતરના ત્રાજમાં મહિલા પર જાહેરમાં ચપ્પા વડે હુમલો કરી યુવક ફરાર થઈ ગયો હતો. 32 વર્ષીય હુમલાખોરે જાહેરમાં કોઈ ડર વિના યુવતી પર જીવલેણ હુમલો કર્યો હતો. ત્યારપછી માતર પોલીસે ઘટના સ્થળે પહોંચી અને આગળની કાર્યવાહી હાથ ધરી હતી. બીજી બાજુ ખેડા સિવિલમાં ગંભીર રીતે ઘાયલ થયેલી યુવતીએ અંતિમ શ્વાસ લીધા છે.

એક તરફી પ્રેમ હોવાનું અનુમાન
ખેડા જિલ્લાના માતર તાલુકાના ત્રાજ ગામે ખોડીયાર પાન પાર્લર પાસે એક યુવકે 18 વર્ષીય યુવતી પર ચપ્પાના ઘા મારીને ફરાર થઈ જતા સમગ્ર વિસ્તારમાં ચકચાર મચી જવા પામી છે. સૂત્રો દ્વારા જાણવા મળ્યા મુજબ હુમલો કરનાર 32 વર્ષીય રાજુભાઈ મગનભાઈ પટેલ 18 વર્ષ યુવતીના એક તરફી પ્રેમમાં પડ્યા હતા અને યુવતી પાસે અવારનવાર બીભસ્ત માંગણી કરતો હતો. છેલ્લા ઘણા સમયથી આ સિલસિલો ચાલતો હતો ત્યારે આજે ત્રાજ ગામે 18 વર્ષે યુવતી જ્યારે ખોડીયાર પાન પાર્લરમાં કોલ્ડ્રીંક્સ લેવા ગઈ દરમ્યાન 32 વર્ષીય રાજુભાઈ પટેલે યુવતી પર ચપ્પાના ઘા મારી હુમલો કરી ફરાર થઈ ગયો હતો.

સૂત્રોના જણાવ્યા મુજબ યુવકે યુવતી પર ચારથી પાંચ વાર તીક્ષ્ણ હથિયારના ઘા મારીને હુમલો કર્યો હતો. જેને લઈને યુવતી લોહી લુહાણ થઈને સ્થળ પર જ ઢળી પડી હતી. મહત્ત્વનું છે કે દિવસેને દિવસે જાહેરમાં એક તરફી પ્રેમમાં પાગલ બનેલા યુવકો યુવતીને મોતને ઘાટ ઉતારી રહ્યા છે. આજે આવી જ વધુ એક ઘટના માતર તાલુકાના ત્રાજ ગામમાંથી સામે આવતા સમગ્ર વિસ્તારમાં ચકચાર મચી છે.