Exclusive: PM મોદી સાથે મુલાકાત બાદ પ્રદીપસિંહ વાઘેલાનું રાજીનામું લેવાયું?

હકીકતમાં PM 28મી જુલાઈએ ગાંધીનગરમાં હતા. તો ભાજપના કહેવા મુજબ પ્રદીપસિંહે પણ એક અઠવાડિયા પહેલા રાજીનામું આપી દીધું હતું. આમ બંને ઘટનાઓ સાથે બની હોવાથી બંને વચ્ચે ખાસ સંબંધ હોવાનું પણ માનવામાં આવી રહ્યું છે.

પ્રદીપસિંહના મામલામાં એવું પણ માનવામાં આવી રહ્યું છે કે, જમીન કાંડના મામલે ઘણા વખતથી તપાસ ચાલી રહી હતી. પરંતુ પોલીસ પાસે જે પુરાવા આવ્યા તે પુરાવા ખૂબ જ સ્ફોટક અને પાર્ટીની છબીને નુકસાન કરે તેવા હતા. માટે પ્રદીપસિંહનું રાજીનામું તરત જ લેવાયું અને કહેવામાં આવ્યું કે હવેથી તમારે કમલમ આવવાની જરૂર નથી.

ભાજપના રજની પટેલે શું કહ્યું?

ભાજપના નેતા રજની પટેલે પ્રદીપસિંહ વાઘેલાના રાજીનામા પર કહ્યું કે, ‘તેમણે પોતાના અંગત કારણોસર પાર્ટીમાંથી સ્વેચ્છિક રાજીનામું આપ્યુ છે. તેમનું રાજીનામું સ્વીકારવામાં આવ્યુ છે. એમણે કહ્યું કે હમણા મને પાર્ટીમાં કામ કરવાની અનુકૂળતા નથી એટલે હું થોડો સમય પાર્ટીમાંથી સ્વૈચ્છીક રાજીનામું માંગું છું.’

પ્રદીપસિંહ વાઘેલાએ શું કહ્યું?

આ પહેલા ખાનગી ચેનલ સાથે વાત કરતા પ્રદિપસિંહ વાઘેલાએ પોતે પાર્ટી અધ્યક્ષના કહેવા પર 7 દિવસ પહેલા જ રાજીનામું આપી દીધું હોવાનું જણાવ્યું હતું. જોકે તેમના રાજીનામાના સ્વીકાર અંગે હજુ પાર્ટી તરફથો કોઈ નિર્ણય લેવામાં આવ્યો નથી. તેમણે કહ્યું હતું કે, મેં માત્ર જવાબદારી છોડી છે, હું પાર્ટીનો વફાદાર કાર્યકર્તા છું અને મેં ક્યારેય કોઈ ખોટું કામ કર્યું નથી. હું આ અગ્નિ પરીક્ષામાંથી બહાર આવીશ. કલમમમાં પ્રવેશ ઉપર પ્રતિબંધની વાત સદંતર ખોટી છે. મારી સામે પણ પત્રિકા યુદ્ધ ચાલે છે.