બનાસકાંઠામાં જળબંબાકારની સ્થિતિ, અમદાવાદ-પાલનપુર હાઈવે પર પાણી ભરાતા એકબાજુનો માર્ગ બંધ

પાલનપુર-અંબાજી રોડ પર પાણી ભરાયા
બનાસકાંઠામાં ભારે વરસાદથી અમદાવાદ-પાલનપુર હાઈવે પર ઘુંટણસમા પાણી ભરાઈ ગયા છે. જેના કારણે વાહન ચાલકો અટવાઈ ગયા છે. એવામાં હાઈવેનો એક તરફનો માર્ગ બંધ કરી દેવામાં આવ્યો છે. તો બીજી તરફ પાલનપુર-અંબાજી હાઈવે પર પણ આવી જ સ્થિતિ છે. અંબાજી હાઈવે ભારે વરસાદ બાદ આખો પાણીમાં ગરકાવ થઈ ગયો છે, જેના કારણે લોકોને પણ અટવાઈ ગયા છે. અંબાજી દર્શન કરવા જતા શ્રદ્ધાળુઓને ભારે મુશ્કેલી આવી રહી છે. એવામાં અંબાજી-દાંતા હાઈવે પરનો વાહન વ્યવહાર ખોરવાઈ ગયો છે.

થરાદમાં ST સ્ટેન્ડમાં પાણી ભરાયા
થરાદમાં પણ ભારે વરસાદ બાદ રસ્તાઓ નદી બન્યા હોય તેવી સ્થિતિ સર્જાઈ છે. થરાદમાં ST બસ સ્ટેન્ડમાં ઘુંટણસમા પાણી ભરાઈ ગયા છે. જિલ્લામાં અત્યાર સુધીમાં 150થી વધુ વૃક્ષો ભારે પવનના કારણે ધરાશાયી થઈ ગયા છે. તો કેટલાય વીજપોલ ધરાશાયી થયા છે. એવામાં વીજપુરવઠો પણ ખોરવાઈ ગયો છે.

સરસ્વતીનો કુંડ ઓવરફ્લોબનાસકાંઢામાં આવેલા કોટેશ્વર મહાદેવ ખાતે સરસ્વતી નદીનો કુંડ ઓવરફ્લો થઈ ગયો છે. અંબાજીથી 7 કિલોમીટર દૂર સરસ્વતીનું ઉદગમ સ્થાન કોટેશ્વર ધામ આવેલું છે. બિપોરજોય વાવાઝોડાના કારણે બનાસકાંઠા જિલ્લામાં મેઘમહેર સતત બીજા દિવસે પણ યથાવત છે. ભારે વરસાદના કારણે સરસ્વતી નદીનું કુંડ ઓવરફ્લો થતા પાણી વહેતું થયું હતું.

સાબરકાંઠામાં પણ વરસાદ
બીજી તરફ સાબરકાંઠા જિલ્લામાં પણ ભારે વરસાદ જોવા મળી રહ્યો છે. છેલ્લા 24 કલાકમાં વડાલી, ઈડર તેમજ પોશીનામાં પાંચ ઇંચ વરસાદ નોંધાયો છે. ખેડબ્રહ્મા, વિજયનગર, હિંમતનગર તથા પ્રાંતિજમાં સાડા ત્રણ ઇંચ વરસાદ નોંધાયો છે.