Jamnagar Rain : હવે જામનગર જળમગ્ન! ઘરો ડુબ્યા... ડ્રોન કેમેરામાં દેખાયા ભયંકર દ્રશ્યો, હેલિકોપ્ટરથી 11નું રેસ્ક્યુ, યુવક વીજપોલ પર ચડ્યો

રંગમતી ડેમના 5 દરવાજા ખોલાયા

તો જામનગર શહેરમાં આવેલ રંગમતી ડેમના 5 દરવાજા 4 ફૂટ સુધી ખોલવામાં આવ્યા છે. જામનગરની રંગમતી નાગમતી નદીમાં ઘોડાપુર આવ્યાં છે, જેના કારણે શહેરના મોટાભાગના વિસ્તારોમાં પાણી ભરાયાં છે. જામનગર શહેરના સ્મશાન ગૃહમાં પણ નદીના પુરનું પાણી ઘુસી જતા સ્મશાન ગૃહ બંધ કરવાની ફરજ પડી છે. તંત્ર દ્વારા લોકોને સાવચેત રહેવા માટે અપીલ કરવામાં આવી છે. ત્યારે જામનગરની તારાજીના કેટલાક દ્રશ્યો સામે આવ્યા છે.

જામનગર શહેરના ડ્રોન કેમેરાના દ્રશ્યો

જામનગર શહેરની ડ્રોન કેમેરા દ્વારા લેવામાં આવેલી તસવીરો સામે આવી છે. જે દર્શાવે છે કે શહેરમાં અતિવૃષ્ટિથી વ્યાપક તારાજી સર્જાઈ છે. રણજીતસાગર વિસ્તારના પટેલ પાર્ક, વૃંદાવન પાર્ક, મોદી સ્કુલ, કાલીંદી સ્કુલ જેવા વિસ્તારોમાં જળ હોનારતન સર્જાઈ છે. શહેરના અનેક વિસ્તારો પાણીમાં ગરકાવ થઈ ગયા છે. તો જામનગરનો મેળો પાણીમાં ગરકાવ થયેલો જોવા મળ્યો છે અને એક યુવક જીવ બચાવવા વીજપોલ પર ચડેલો જોવા મળ્યો છે. જે મદદ માંગી રહ્યો છે.

વીજપોલ પર ચડેલા યુવકને હેલિકોપ્ટરની મદદથી બચાવાયો

જામનગરમાં મહાપ્રભુજીની બેઠક પાસે ભારે વરસાદના પરિણામે રસ્તાઓ પાણીમાં ગરકાવ થઈ ગયા હતા. જેના કારણે એક યુવક જીવ બચાવવા માટે થાંભલા પર ચડી ગયો હતો. ત્યારબાદ આ થાંભલા પર ફસાયેલ યુવકને જિલ્લા વહિવટી તંત્રની ટીમ દ્વારા એરફોર્સના હેલિકોપ્ટરની મદદ લઇ રેસ્ક્યુ કરી બચાવી લેવામાં આવ્યો હતો.

નવાગામમાં 11 લોકોનું હેલિકોપ્ટરથી કરાયું રેસ્ક્યૂ

જામનગર જિલ્લામાં ભારે વરસાદના કારણે લાલપુર તાલુકાના નવાગામ વાડી વિસ્તારમાં 11 લોકો ફસાયા હોવાની જાણ થતાં જ પ્રાંત અધિકારી લાલપુર અને ટીમ દ્વારા સતર્કતા દાખવી એરફોર્સના હેલિકોપ્ટર મારફત સુરક્ષિત સ્થળે ખસેડયા હતા. પાણીમાં ફસાયેલા તમામને હેલિકોપ્ટરની તાત્કાલિક મદદ મળતા તેઓને સુરક્ષિત સ્થળે ખસેડવાનું શક્ય બન્યું હતું અને જીવનું જોખમ ટાળ્યું હતું.

મંગળદીપ સોસાયટીના લોકોનું પોલીસે કર્યું રેસ્ક્યૂ

જામનગર શહેરના રણજીતસાગર રોડ પાસે આવેલ મંગળદીપ સોસાયટીમાં પાણી ભરાતા સિટી-એ ડિવિઝન પોલીસ સ્ટેશનના પી.આઈ. નિકુંજસિંહ ચાવડા અને સર્વેલન્સ ટીમ દ્વારા લોકોનું રેસ્ક્યૂ કરીને તેને સ્થળાંતર કરાયા હતા.

બચુનગર વિસ્તારમાં 12 લોકોનું રેસ્ક્યૂ

જામનગર શહેરમાં બચુનગર વિસ્તારમાં જલ ભરાવને કારણે ફસાયેલ 12 જેટલા લોકોનું મામલતદાર, જામનગર શહેર અને SDRF ટીમ દ્વારા બચાવકાર્ય હાથ ધરી તેમને સુરક્ષિત સ્થળે ખસેડવામાં આવ્યા હતા.

હોમગાર્ડ દળ દ્વારા ફુડ પેકેટ તૈયાર કરાયા

ભારે વરસાદ અને પૂરની પરિસ્થિતિમાં અસરગ્રસ્ત વિસ્તારોના નાગરિકો માટે જામનગર જિલ્લા હોમગાર્ડઝ દળના જવાનો દ્વારા ફુડ પેકેટ બનાવવામાં આવી રહ્યા છે. જિલ્લામાં ભારે વરસાદને કારણે અસરગ્રસ્ત વિસ્તારોમાં લોકોને મદદરૂપ થવા જિલ્લા હોમગાર્ડ દળ દ્વારા ફૂડ પેકેટ તૈયાર કરી અસરગ્રસ્ત વિસ્તારોમાં વિતરણની વ્યવસ્થા ગોઠવવામાં આવેલ છે.

જામનગરના લોકો માટે ઈમરજન્સી નંબર

જામનગર જિલ્લામાં ભારે વરસાદના પગલે સૌ નાગરિકોને સતર્ક રહેવા તેમજ આપાતકાલિન સ્થિતિ સર્જાય તો તાત્કાલિક જિલ્લા ડિઝાસ્ટર કંટ્રોલરૂમનો સંપર્ક કરવા અપીલ છે.