‘બંને પાત્રો સહમતીથી સંબંધ બાંધે તો…’, લગ્નની લાલચે દુષ્કર્મના કેસમાં હાઈકોર્ટનો મહત્વપૂર્ણ ચૂકાદો

શું હતો સમગ્ર કેસ?
અમદાવાદના ઓઢવ વિસ્તારમાં રહેતા એક મહિલા અને પુરુષ સંપર્કમાં આવ્યા બાદ બંને વચ્ચે શારીરિક સંબંધો બંધાયા હતા. જોકે પાછળથી યુવતી દ્વારા આક્ષેપ કરવામાં આવ્યો હતો કે યુવકે લગ્નની લાલચ આપીને તેની સાથે શારીરિક સંબંધ બાંધ્યા હતા. જ્યારે લગ્નની વાત નીકળી તો યુવકે ઈનકાર કરી લીધો. આથી યુવતીએ પોલીસ સ્ટેશનમાં ફરિયાદ નોંધાવી હતી.

જોકે બંને વચ્ચે બાદમાં સમાધાન થઈ જતા યુવતીએ ફરિયાદ પાછી ખેંચી લીધી હતી અને બંને વચ્ચે ફરી પ્રેમ સંબંધ બંધાયા હતા. જોકે યુવકે સંબંધ બાંધ્યા બાદ બીજી વખત પણ લગ્નનો ઈનકાર કરતા યુવતીએ ફરીથી પોલીસમાં ફરિયાદ નોંધાવી હતી અને લગ્નની લાલચ આપીને શારીરિક શોષણ કરવાનો આરોપ યુવક પર લગાવ્યો હતો.

હાઈકોર્ટે પોતાના ચૂકાદામાં શું કહ્યું?
આ કેસમાં હાઈકોર્ટે અવલોકન કરતા જણાવ્યું હતું કે, જો પુખ્તવયના યુવક અને યુવતી લગ્ન કે અન્ય કોઈ લાલચ આપીને પોતાની ઈચ્છાથી શારીરિક સંબંધો બાંધે છે, તો પાછળથી મહિલા કલમ 376 મુજબ બળાત્કારની ફરિયાદ ન કરી શકે.