27 વર્ષમાં કામ કર્યા હોત તો પથ્થર ન મારવા પડતા, નાના બાળકને પથ્થર વાગતા ઈટાલિયાએ રૂમાલ દાબીને કહ્યું…

આટલો મોટો પથ્થર ઉડતો ના આવે, મારવામાં આવ્યો છેઃ ઈટાલિયા
ગુજરાત વિધાનસભાની ચૂંટણીમાં આક્રમકતા છેલ્લા ઘણા સમયથી જોવા મળી રહી છે. જોકે શાબ્દિક આક્રમકતા સમજી શકાય છે પરંતુ હિંસાનો સહારો લેવો તે ક્યારેય બંધારણીય દૃષ્ટીથી યોગ્ય ગણી શકાય નહીં. હાલમાં જ સુરતમાં આપ અને ભાજપના કાર્યકરો વચ્ચે લોહીયાળ જંગ ખેલાયો હતો. પોલીસે જે તે સમયે વિસ્તારને કોર્ડન કરીને પગલા લીધા હતા. હવે જ્યારે ગુજરાત આમ આદમી પાર્ટીના પ્રદેશ અધ્યક્ષ ગોપાલ ઈટાલિયાની જાહેર સભા સુરતમાં હતી ત્યારે એક નાના બાળકને પથ્થર વાગ્યો હતો. ગોપાલ ઈટાલિયાએ બાળકને માથાના ભાગે રુમાલ દબાવી દીધો હતો. તેમણે આ દરમિયાન ભાજપ પર પ્રહાર કર્યા હતા અને પથ્થરમારાનો આરોપ પણ ભાજપ પર લગાવ્યો હતો કે આટલો મોટો પથ્થર ઉડતો ન આવે, આ મારવામાં આવ્યો છે અને ભાજપના માણસોને ખબર પડવી જોઈએ કે પથ્થર ગમે ત્યાં વાગે. અહીં નાના બાળકને પથ્થર વાગ્યો છે. તે તો સાવ નિર્દોષ બાળક છે. તેને તો ખબર પણ નથી રાજકારણ શું છે.

#Surat માં કતારગામમાં હારથી ડરી ગયેલી ભાજપે પથ્થરમારો કરાવ્યો- ગોપાલ ઈટાલિયા, ઘટનામાં એક બાળકને થઈ ઈજા, જુઓ ઈટાલિયાએ શું કહ્યું#Gujarat #Election2022 #electionwithgujarattak pic.twitter.com/7WVJGhUdJA

— Gujarat Tak (@GujaratTak) November 26, 2022

આ પથ્થર હું સાચવીને રાખીશ અને 8 ડિસેમ્બરે…: ઈટાલિયા
ગોપાલ ઈટાલિયાએ ભાજપને આડેહાથ લેતા કહ્યું કે, 27 વર્ષમાં જો કામ કર્યા હોત તો પથ્થરમારો ન કરવો પડ્યો હોત. પથ્થરો કેમ મારવા પડે છે. તમે કામ કર્યા છે તો તમે કામ પર વાત કરો જનતાને સમજાવો, કે આ કારણે ગોપાલને મત ન આપશો. જો જનતા તમારી વાત સ્વીકારે અને મને મત ન આપે તો તમારું પલડું ભારે નહીં તો મારું. આમાં પથ્થર મારવાની વાત ક્યાં આવી. લોકોને તમારા કામ સમજાવો. હું શિક્ષણની વાત કરું છું, આરોગ્યની વાત કરું છું, મોંઘવારીની વાત કરું છું એટલે પથ્થર મારવાના? આ પથ્થરને હું સાચવી રાખીશ અને 8 ડિસેમ્બરે આ પથ્થર જેવો જ જવાબ આપીશ.
(વીથ ઈનપુટઃ સંજયસિંહ રાઠોડ, સુરત)