વલસાડમાં પૈસા માટે પિતા-પુત્ર વચ્ચે લોહિયાળ ખેલ, પિતાએ સગા દીકરાને કુહાડીના ઘા ઝિંકી પતાવી નાખ્યો

ખેડૂતને ઝાડ કપાવ્યાના 4 લાખ મળ્યા હતા
વિગતો મુજબ, વલસાડના પારડીમાં 70 વર્ષના એક ખેડૂત નામદેવ નાયકાએ પોતાની જમીનમાં ઉગેલા ઝાડ કપાવ્યા હતા. જેમાંથી ખેડૂતને 4 લાખ રૂપિયા મળ્યા હતા. દરમિયાન ખેડૂતનો દીકરો નરોત્તમ નાયકા લાંબા સમયથી પિતા પાસે નવું ઘર બનાવવા માટે વારંવાર પૈસાની માગણી કરી રહ્યો હતો. જોકે પિતા તેને પૈસા આપતા નહોતા. દરમિયાન પુત્રને જાણ થઈ કે પિતાને ઝાડ કપાવ્યા બાદ લાખો રૂપિયા મળ્યા છે. એવામાં તે પૈસાની માગવા માટે આવ્યો હતો.

પૈસા માગવા આવેલા દીકરા સાથે થઈ બોલાચાલી
આ દરમિયાન કોઈ બાબતે પિતા અને પુત્ર વચ્ચે ઉગ્ર બોલાચાલી શરૂ થઈ ગઈ હતી. ત્યારે ઉશ્કેરાઈ ગયેલા પિતાએ કુહાડી લઈને દીકરા પર જ હુમલો કરી દીધો હતો. જેમાં પુત્રને ગંભીર ઈજાઓ પહોંચતા મોત નિપજ્યું હતું. ઘટનાની જાણ થતા જ સ્થાનિક લોકોએ 108 અને પારડી પોલીસને જાણ કરી હતી. હાલમાં પોલીસે લાશનો કબજો મેળવી તેને પોસ્ટ મોર્ટમ માટે મોકલીને આગળની કાર્યવાહી હાથ ધરી છે. તો બીજી તરફ પિતાને પણ ઈજા પહોંચતા તેને 108 મારફતે વલસાડની સિવિલ હોસ્પિટલમાં ખસેડવામાં આવ્યા છે.