‘દારૂ પીધો રે…’, દારૂના નશામાં ચૂર શિક્ષક ક્લાસમાં જ બેન્ચ પર ઊંઘી ગયો, બાળકો ભગવાન ભરોસે

ક્લાસમાં જ દારૂ પીને આરામ કરતા શિક્ષક
વિગતો મુજબ, નર્મદાના ગરુડેશ્વરના કોયારી ગામે શરમજનક કિસ્સો સામે આવ્યો છે. પ્રાથમિક શાળાના શિક્ષક રાજુ સોલંકી નામના શિક્ષક કથિત રીતે દારૂ પીને શાળા ઊંઘતા જોવા મળ્યા હતા. એક તરફ વિદ્યાર્થીઓ શાળામાં ભણવા આવ્યા છે, બીજી તરફ બેન્ચ પર શિક્ષક કથિત દારૂ પીને આરામ ફરમાવી રહ્યા છે. ત્યારે ગુજરાતના ગામડાઓમાં આ કેવા પ્રકારનું શિક્ષણ મળી રહ્યું છે તેની પોલી ખુલી રહી છે.

સ્થાનિક વ્યક્તિએ વીડિયો ઉતારી વાઈરલ કર્યો
સ્થાનિક વ્યક્તિએ સ્કૂલમાં જઈને તેનો વીડિયો ઉતાર્યો છે. જેમાં જોઈ શકાય છે કે કેટલાક બાળકો ક્લાસમાં એકલા જ બેઠા છે અને તેમને ભણાવવા માટે કોઈ શિક્ષક નથી. ક્લાસમાં પાછળ ટીવી ચાલી રહ્યું છે અને બાળકો તેમના પુસ્તકો ખોલીને જાતે અભ્યાસ કરી રહ્યા છે. ત્યારે બીજી બાજુ ક્લાસમાં પંખો ચાલુ છે નીચે બેન્ચ પર શિક્ષક આરામ ફરમાવી રહ્યા છે. વ્યક્તિ તેમને જગાડવાનો પણ પ્રયાસ કરે છે, પરંતુ શિક્ષકને જાણે કોઈ પરવા ન હોય તેમ તેમના એકવાર પણ આંખ ખોલીને સામે જોતા પણ નથી.

(વિથ ઈનપુટ: નરેન્દ્ર પેપરવાલા)