પાટીદારો ફરી એકવાર મેદાને, નરેશ પટેલ સાથે મુલાકાત બાદ કોંગ્રેસે કરી મોટી વાત

કોંગ્રેસનું મોવડી મંડળ નરેશ પટેલને મળવા માટે પહોંચ્યું
આજે જ કોંગ્રેસ આગેવાનોએ ખોડલધામ ખાતે કોંગ્રેસી નેતાઓ સાથે મુલાકાત યોજી હતી. આ મુલાકાત બાદ કોંગ્રેસ નેતા મનહર પટેલે જણાવ્યું કે, નરેશ પટેલે અમને તમામ પ્રકારની મદદની બાંહેધરી આપી છે. રાજકારણમાં પાટીદારોનું પ્રભુત્વ અને મહત્વ વધારવાના મુદ્દે ચર્ચા થઇ હતી. કોંગ્રેસના પાટીદાર સંકલન સમિતીના સભ્યોની મુલાકાતને પગલે નવી અટકળો વહેતી થઇ છે.

કિંગમેકરની ભુમિકામાં જોવા મળશે નરેશ પટેલ
જો કે હવે નરેશ પટેલ પ્રત્યક્ષ રીતે મેદાનમાં ઉતરવા નથી માંગતા અને તેઓ હવે ગુજરાતની રાજનીતિમાં કિંગમેકરની ભુમિકા ભજવવા માંગતા હોય તેવું લાગી રહ્યું છે. તેઓ દરેક પક્ષ સાથે ચર્ચાઓ કરે છે માર્ગદર્શન કરે છે. ખાસ કરીને પાટીદાર નેતાઓ સાથે તે મુલાકાત કરતા રહે છે. દરેક પક્ષના નેતાઓ પણ તેમની પાસે જાય છે. જો કે નરેશ પટેલ પોતાનું સંગઠન પણ બનાવી રહ્યા છે. જેનો તેઓ ભવિષ્યે રાજનીતિમાં પણ ઉપયોગ કરશે. હાલ તો તેઓ સામાજિક સંગઠનના નામે તેઓ પાટીદારોને એક સુત્રથી જોડવાની વાત કરી રહ્યા છે.