EXCLUSIVE: મુકેશ લંગાળીયા પાસેથી છેલ્લું કામ કઢાવ્યા બાદ પાટીલ રાજીનામું મંજૂર કરશે, સેતા લગભગ નક્કી: સુત્ર

હાલ ગુજરાત ભાજપના પ્રદેશ પ્રમુખ દ્વારા લંગાળીયાનું રાજીનામુ મંજૂર કરવામાં આવ્યું નથી. આગામી 3 તારીખે ભાજપનો ભવ્ય કાર્યક્રમ ભાવનગરમાં છે. જેમાં સી.આર પાટીલ પોતે પણ હાજર રહેશે ઉપરાંત અનેક ઉચ્ચ પદસ્થ નેતાઓ હાજર રહેવાનાં છે. જેમાં કોઇ પ્રકારનું પણ અસંતોષ કે અવ્યવસ્થા ન સર્જાય તે માટે પાટીલે આ રાજીનામું હોલ્ડ પર રાખ્યું હોવાનું સુત્રો જણાવી રહ્યા છે.

અત્રે નોંધનીય છે કે, ભાજપ દ્વારા હવે ભાવનગરની કમાન દિલીપ સેતાને સોંપવામાં આવી શકે છે. દિલીપ સેતા અગાઉ પણ ભાવનગરની કમાન સંભાળી ચુક્યાં છે. જો કે હાલમાં ભાજપના 3 તારીખના કાર્યક્રમને ધ્યાને રાખી પાટીલ રાજીનામું હોલ્ડ પર રાખીને બેઠા છે. 3 તારીખના કાર્યક્રમ બાદ તેઓ રાજીનામું સ્વિકારી લેવામાં આવે તેવી શક્યતાઓ સુત્રો વ્યક્ત કરી રહ્યા છે.

મુકેશ લંગાળીયા 50થી 100 કાર્યકર્તા સાથે પાટીલના બંગ્લે પહોંચ્યા
મુકેશ લંગાળીયા દ્વારા હાલમાં જ કરવામાં આવેલા રાજપુત સમાજ અંગેના વાણીવિલાસને જોતા રાજપુત સમાજ દ્વારા તેની વિરુદ્ધ પ્રદર્શન કરવામાં આવ્યું હતું. જેના પગલે કાલે રાત્રે જ મુકેશ લંગાળીયા સી.આર પાટીલના બંગ્લે પોતાનાં 50 થી વધારે કાર્યકર્તાઓ સાથે પહોંચ્યા હતા. અહીં તેમણે પ્રદેશ પ્રમુખ સી.આર પાટીલને પોતાનું રાજીનામું સુપ્રત કરી દીધું હતું.

પાટીલ રાજીનામા મુદ્દે વિમાસણમાં
જો કે પાટીલ દ્વારા હજી સુધી આ રાજીનામા પર મંજૂરીની મહોર મારવામાં આવી નથી. મુકેશ લંગાળીયાને મનાવવા માટેના પ્રયાસો ચાલી રહ્યા છે. પાટીલ કોઇ વચ્ચેનો રસ્તો શોધવાનો પ્રયાસ કરી રહ્યા છે. જેથી લંગાળીયા પણ બચી જાય અને રાજપુત સમાજમાં પેદા થયેલો અસંતોષ પણ ખાળી શકાય. હાલ તો રાજીનામું હોલ્ડ પર છે.

રાજપુત સમાજ અંગે વિવાદિત નિવેદનનો AUDIO વાયરલ
અત્રે ઉલ્લેખનીય છે કે, ભાવનગર: ગુજરાતમાં વિધાનસભાની ચૂંટણી જેમ જેમ નજીક આવતી જાય છે તેમ તેમ ભાજપમાં વધતા જતા વિવાદો અને વિખવાદોને કારણે એક સાંધે ત્યાં તેર તૂટે જેવી સ્થિતિ સર્જાઈ છે. ભાવનગર જિલ્લા ભાજપના પ્રમુખ મુકેશ લંગાળીયા પોતાની વાણી વર્તણૂકને કારણે અવાર નવાર વિવાદોમાં આવતા હોય છે. ત્યારે તાજેતરમાં ભાવનગર સિંહોરમાં ભાજપની બેઠકમાં તાલુકા મહામંત્રી વિજયસિંહને ગેરહાજર રહ્યાં હતા અને કારડીયા રાજપૂત સમાજના કાર્યક્રમમાં હાજર રહ્યાં હતા. જેને લઈને મુકેશભાઈએ વિવાદિત નિવેદન આપ્યું હતું કે “ભાજપ મોટો કે કારડીયા રાજપૂત સમાજ?’ તાલુકા ભાજપ પ્રમુખને કહી મહામંત્રીનું રાજીનામું લઈ લેવા સુધીના ધમકીભર્યા સૂરો મુકેશભાઈએ ઉચ્ચારતા કારડીયા રાજપૂત સમાજમાં રોષ ફેલાયો છે.

મુકેશ લંગાળીયાએ માફી માંગી
આ બાદ મુકેશભાઈ લંગાળીયાએ માફી માગતો વીડિયો વાયરલ કર્યો હતો. જેમાં તેમણે કહ્યું કે, આ અંગે બાદમાં મુકેશ લંગાળીયાએ કહ્યું હતું કે, મારા નિવેદનનો ઓડિયો કોઈએ રેકોર્ડ કરીને તેને એડિટ કરીને રજૂ કર્યો છે. મારો ઈરાદો કારડીયા રાજપૂત સમાજનું અપમાન કરવાનો નહોતો. મારા નિવેદનથી જો કોઈને ઠેસ પહોંચી હોય તો હું માફી માગું છું.