કચ્છમાં વાવાઝોડાની અસર શરૂ, માંડવી-દ્વારકામાં ભારે પવન સાથે વરસાદ, દરિયાએ બતાવ્યું રૌદ્ર સ્વરૂપ

દ્વારકાથી લઈને અમદાવાદ સુધી વરસાદી માહોલ
બીજી તરફ દ્વારકામાં પણ ગઈકાલથી સવાર સુધીમાં 5 ઈંચ જેટલો વરસાદ પડી ચૂક્યો છે. દ્વારકા નજીકથી પસાર થઈ રહેલા વાવાઝોડાને કારણે સમુદ્રમાં 15 થી 20 ફૂટના મોજા ઉછળી રહ્યા છે. ગઈકાલ કરતાં આજ સવારથી પવનની ગતિમાં વધારો જોવા મળી રહ્યો છે. અમદાવાદમાં પણ ગુરુવારે સવારથી જ વરસાદી માહોલ છવાયો છે અને જુદા જુદા વિસ્તારોમાં વરસાદી ઝાપટા પડી રહ્યા છે. તો બનાસકાંઠા, નવસારીમાં પણ ભારે પવન સાથે સવારથી વરસાદ પડી રહ્યો છે.

દ્વારકા ડેપોની બસો જામનગરમાં મૂકાઈ
વાવાઝોડાના કારણે એસ.ટીના દ્વારકા તરફના તમામ રૂટો બંધ કરી દેવામાં આવ્યા છે અને દ્વારકા ડેપોની તમામ બસોને જામનગર ડેપોમાં સુરક્ષિત રાખી દેવામાં આવી છે. તેમજ શહેરના માર્ગો પર પણ લોકોની ચહેલ પહેલ ઓછી જોવા મળી રહી છે.

મુખ્યમંત્રી રાખી રહ્યા છે વાવાઝોડા પર નજર
વાવાઝોડાના એલર્ટના પગલે મુખ્યમંત્રી, હવામાન વિભાગના ડાયરેક્ટર મનોરમા મોહંતી તથા અન્ય અધિકારીઓ સ્ટેટ ઈમરજન્સી ઓપરેશન સેન્ટર પહોંચી ગયા છે. ત્યાંથી વાવાઝોડાની દિશા અને સ્થિતિ પર નજર રાખવામાં આવી રહી છે.

જૂનાગઢના માંગરોળ બંદર પર 100KMની ઝડપે પવન ફૂંકાયો
જૂનાગઢના માંગરોળ બંદર પર પણ 90થી 100 કિમીની ઝડપે પવન ફૂંકાઈ હ્યો છે. વરસાદના પગલે દરિયામાં વિઝિબિલિટી લગભગ શૂન્ય થઈ ચૂકી છે અને 15થી 20 ફૂટ ઊંચા મોજા ઉછળી રહ્યા છે. જૂનાગઢ જિલ્લામાં ધીમે ધારે વરસાદ શરૂ થઈ ગયો છે.

(વિથ ઈનપુટ: રોજક જાની, રજનીકાંત જોશી, દર્શન ઠક્કર, ભાર્ગવી જોશી, ધનેશ પરમાર)