ભરૂચમાં નર્મદા એપાર્ટમેન્ટનો બ્લોક ધરાશાયી થતા પરિવાર કાટમાળમાં દબાયો, 1નું મોત

વહેલી સવારે જ અચાનક નર્મદા એપાર્ટમેન્ટનો બ્લોક નં.18નો એક ભાગ પત્તાના મહેલની જેમ ધરાશાયી થઈ ગયો હતો. એવામાં કાટમાળ હટાવવો પણ મુશ્કેલ બન્યો હતો. ભરૂચ નગરપાલિકાના કમિટી ચેરમેન અને સ્થાનિક નગર સેવક હેમેન્દ્ર પ્રજાપતિ મદદે દોડી આવ્યા હતા અને રેસ્ક્યુની જવાબદારી ઉપાડી હતી. આ દરમિયાન 38 વર્ષના પંકજ ચૌહાણનું મોત નિપજ્યું હતું જ્યારે અન્ય પરિવારજનોને સહીસલામત બહાર કાઢી લેવામાં આવ્યા હતા.

ખાસ વાત છે કે ભરૂચ નગરપાલિકા દ્વારા દરવર્ષે સત્તાવાર યાદી જાહેર કરવામાં આવે છે, જેમાં જર્જરિત ઈમારતોના માલિકોને મકાન ખાલી કરીને ઉતારી લેવા નોટિસ અપાય છે. પરંતુ નોટિસ આપ્યા બાદ પોતાની જવાબદારૂ પૂર્ણ થઈ ગઈ હોવાનું માનીને તંત્ર દ્વારા કોઈ કડક કાર્યવાહી કરવામાં આવતી નથી. જો વાતને ગંભીરતાથી લઈને બિલ્ડિંગ ખાલી કરાવે તો આ પ્રકારની દુર્ઘટના થતા અટકાવી શકાઈ હોત.