બનાસકાંઠા: પૂર ઝડપે જતી સ્કોર્પિયો 3 દુકાનના શેડ અને શટર તોડી ડિવાઈડર સાથે અથડાઈ, 3 લોકોનાં મોત

વહેલી સવારે થરાદ-ધાનેરા હાઈવે પર અકસ્માત
વિગતો મુજબ, થરાદ-ધાનેરા હાઈવે પર પરોઢિયે એક સ્કોર્પિયો કાર પૂર ઝડપે જઈ રહી હતી. આ દરમિયાન અચાનક ચાલકે ગાડી પરથી કાબુ ગુમાવતા સ્કોર્પિયો કાર 3 દુકાનોના શેડ અને એક દુકાનનું શટર તોડીને ડિવાઈડર સાથે અથડાઈ હતી. અકસ્માત એટલો ભયાનક હતો કે આખી સ્કોર્પિયો કારનો બુકડો બોલી ગયો હતો. અકસ્માતમાં 3 લોકોના કરુણ મોત નિપજ્યા હતા, તો 3 લોકો ઈજાગ્રસ્ત થઈ ગયા હતા. હાલમાં મૃતકો પમરુ ગામના હોવાની માહિતી મળી રહી છે. જોકે તેમની ઓળખ થઈ શકી નથી.

પોલીસે અકસ્માતનું કારણ જાણવા તપાસ હાથ ધરી
હાલમાં પોલીસ ઘટનાસ્થળે પહોંચી છે અને મૃતકોને પોસ્ટમોર્ટમ માટે ખસેડવામાં આવ્યા હતા. તો બીજી તરફ અકસ્માત કેવી રીતે બન્યો તે અંગે પણ વધુ તપાસ હાથ ધરવામાં આવી છે.