વડોદરામાં 200 કરોડના અટલ બ્રિજના 6 મહિનામાં આવા હાલ! એક વરસાદમાં પ્રોટેક્શન વોલ ધરાશાયી

રવિવારે વરસાદ બાદ બ્રિજની દિવાલ તૂટી
રવિવારે વરસેલા ભારે વરસાદને પગલે વડોદરામાં મનીષા ચાર રસ્તાથી શરૂ થતા અટલ બિજની બાજુની પ્રોટેક્શન વોલ ધરાશાયી થઈ ગઈ હતી. ભારે પવન અને વરસાદના કારણે બ્લોક લગાવેલી દિવાલ તૂટી હતી, જોકે બ્રિજને કોઈ નુકસાન થયું નહોતું. ત્યારે 200 કરોડના ખર્ચે બનેલા આ બ્રિજને 6 મહિના પહેલા જ ખુલ્લો મૂકવામાં આવ્યો છે. ત્યારે બ્રિજની કામગીરી સામે સવાલ ઉઠી રહ્યા છે.

સેફ્ટી વોલના બ્લોક્સ પણ તૂટી ગયા
સેફ્ટી વોલ તૂટવાની જાણ થતા જ વડોદરા મહાનગરપાલિકાના અધિકારીઓ દોડી આવ્યા હતા. જેમાં તપાસમાં સેફ્ટી વોલમાં વાપરમાં આવેલા બ્લોક્સ પણ તૂટી ગયા હોવાનું જણાયું હતું. એવામાં વોલમાં હલકી ગુણવત્તાનું મટીરિયલ વાપરાયું હોવાની આશંકા ઉદભવી રહી છે. અગાઉ પણ આ બ્રિજની દિવાલમાં તિરાડ પડવાની ઘટના બની હતી, જે બાદ તેને રિપેરિંગ કરવામાં આવી હતી.

નોંધનીય છે કે, રૂ.200 કરોડના ખર્ચે વડોદરામાં બનેલો આ અટલ બ્રિજ રાજ્યનો સૌથી લાંબો બ્રિજ છે. તે ગેડા સર્કલથી મનિષા ચોકડી સુધી 3 કિલોમીટરની લંબાઈ ધરાવે છે.