ખેડા-આણંદમાં શનિવારે પણ શાળાઓ બંધઃ સોમવારથી રાબેતા મુજબ

શાળાના સ્ટાફને રહેવું પડશે હાજર
બિપોરજોય વાવાઝોડાની અસર ખેડા તથા આણંદ જિલ્લામાં આવતીકાલે પણ જોવા મળી શકે છે. બન્ને જિલ્લામાં ભારે પવન સાથે વરસાદની આગાહી કરાઈ છે. જે પરિસ્થિતિને ધ્યાને લઇ 17 જૂન 2023ના રોજ જિલ્લાની તમામ પ્રાથમિક શાળાઓ બંધ રાખવા જિલ્લા પ્રાથમિક શિક્ષણ અધિકારી દ્વારા આદેશ કરવામાં આવ્યો છે. તો જિલ્લા પ્રાથમિક શિક્ષણાધિકારી દ્વારા શાળાના સ્ટાફને ફરજ પર હાજર રહેવા જણાવવામાં આવ્યું છે. તા. 19-06-2023થી રાબેતા મુજબ શાળાઓ ખુલશે. તેવો પરિપત્ર જાહેર કરાયો છે.

એના આંસુઓમાં છૂપાઈ હતી બિપોરજોયના કારણે થયેલા અંધકારમય ભવિષ્યની ઝાંખી

આજે રજા હોઈ મોટી ઘટના ટળી
મહત્વનું છે કે, આજે પણ બન્ને જિલ્લામાં બિપોરજોય વાવાઝોડાની અસર વર્તાઈ હતી. મહુધાની ઉંદરા પ્રાથમિક શાળામાં વહેલી સવારે બિપરજોય વાવાઝોડાથી આવેલા ભારે પવનના કારણે શાળાના મકાનના પતરા ઉડી ગયા હતા. એટલુ જ નહીં પતરાની પેરાફીટ તેમજ મકાનના પીલ્લર પણ પડી ગયા હતા. જેના કારણે પીલ્લરનો કાટમાળ ક્લાસરૂમમાં પડતા શાળાના અંદર રહેલા બેન્ચીસ, એલ ઈ ડી ટીવી તથા વિદ્યાર્થીઓના પુસ્તકોને નુકસાન થયું હતું. જોકે વાવાઝોડાના કારણે શિક્ષણ વિભાગ દ્વારા શાળામાં આજે રજા આપવામા આવી હોવાના કારણે કોઈ બાળકો કે શિક્ષકો હાજર નહોતા. જેને લઈ મોટી ઘાત ટળી હતી.