કેનેડામાં ભણવા માટે ગયેલા અમદાવાદના 19 વર્ષના યુવકનું મોત, બોડી ભારત મોકલવા ક્રાઉડ ફંડિગ શરૂ કરાયું

21 જુલાઈએ વર્સિલ પટેલનો અકસ્માત થયો હતો
વિગતો મુજબ, વર્સિલના મિત્ર રાજન પટેલે ક્રાઉડ ફંડિંગ માટે મૂકેલી પોસ્ટમાં લખ્યું છે કે, વર્સિલનો 21 જૂલાઈ 2023ના રોજ બેરી ખાતે રોડ ક્રોસ કરતા દરમિયાન અકસ્માત થયો હતો. એક કારે ટક્કર મારતા વર્સિલનું મોત થઈ ગયું હતું. વર્સિલ અમદાવાદનો રહેવાસી છે અને તે 19 વર્ષનો હતો. પરિવારજનો છેલ્લીવાર તેનું મોઢું જોઈ શકે તે માટે વર્સિલની બોડીને ભારત મોકલવા માટે ડોનેટ કરવા રાજન અપીલ કરી રહ્યો છે. કેનેડાના લોકલ મીડિયા રિપોર્ટ મુજબ ઘટના 21 જુલાઈએ રાત્રે 10.15 વાગ્યે બની હતી.

ક્રાઉડ ફંડિગથી 21000 ડોલર એકઠા કરાયા
અકસ્માત બાદ ઈમરજન્સી સર્વિસ તરત જ ત્યાં પહોંચી ગઈ હતી, પરંતુ વર્સિલનું મોત થઈ ગયું હતું. પોલીસે આ મામલે કાર ચાલકની ધરપકડ કરી છે. હાલમાં વર્સિલના મૃતદેહને ભારત પરત લાવવા માટે ક્રાઉડ ફંડિંગથી 21000 ડોલર એકઠા કરી લેવામાં આવ્યા છે અને હજુ 9000 ડોલરની જરૂર છે. ત્યારે વર્સિલના મિત્રો લોકોને આ માટે ઉદાર હાથે દાન કરવા વિનંતી કરી રહ્યા છે.