‘હાર્દિક’ અભિનંદન! કોંગ્રેસના પૂર્વ પ્રમુખ હવે વિજળી યુનિયનના પ્રમુખ બન્યા

ચાર મહિના સુધી સામાન્ય કાર્યકર્તા તરીકે નિભાવી ફરજ
મે 2022 માં કોંગ્રેસનો ત્યાગ કર્યા બાદ હાર્દિક પટેલે જુન મહિનામાં ભાજપમાં એક સામાન્ય કાર્યકર્તા (રામ સેતુમાં એક નાનકડી ખિસકોલીની ભુમિકા) પર પસંદગી ઉતારી હતી. 4 મહિના જેટલો સમય રાહ જોયા બાદ આખરે ભાજપે તેને હવે એક પદ આપી દીધું છે. હાલમાં જ હાર્દિક પટેલને 12,700 સભ્યો ધરાવતા વીજળી કર્મચારી મહામંડળના કાર્યકારી પ્રમુખની જવાબદારી સોંપવામાં આવી છે. આ બદલ હાર્દિક પટેલે ફેસબુક પોસ્ટ કરીને તમામનો આભાર પણ વ્યક્ત કર્યો હતો.

લાખોની જનમેદની હોય તેવા કાર્યક્રમોમાં હાજર રહેતો હાર્દિક ભાજપમાં જોડાયા બાદ ચશ્મા વિતરણના કાર્યક્રમમાં ન માત્ર હાજર પરંતુ તેના માટે લોકોને આમંત્રણ આપતા પોસ્ટર શેર કરતો પણ જોવા મળ્યો હતો. આટલી આકરી મહેનત બાદ હવે તેને એક પદ પ્રાપ્ત થયું છે. જે બદલ તે ભાજપનો આભાર પણ વ્યક્ત કરી રહ્યો છે. જો કે હજી સુધી ચૂંટણીમાં ટિકિટ મળશે કે કેમ તે અંગે ન તો હાર્દિક ન તો કોઇ નેતા કાંઇ પણ બોલવા તૈયાર નથી.