જેતપુરમાં રખડતા ઢોરના હુમલામાં 9 વર્ષના બાળકનું મોત, ક્યારે અટકશે રસ્તા પરનો આતંક?

Torture of stray cattle: ગુજરાતમાં છેલ્લા ઘણા સમયથી રખડતા ઢોરના ત્રાસથી લોકો ત્રાહિમામ પોકારી ઉઠ્યા છે. શહેરોમાં રખડતા ઢોર સામે અંકુશ અભિયાન ચલાવવાના દાવા તો ઘણા કરાય છે પરંતુ રખડતા પશુ પર નિયંત્રણ મેળવવામાં વહીવટી તંત્ર સફળ નીવડી શક્યું નથી. આવા પશુમાલિકો સામે અનેક કિસ્સાઓમાં FIR પણ નોંધાઈ છે. તેમ છતાં પશુઓની અડફેટે લોકો ચઢતા રહ્યા છે. તેમજ રખડતા ઢોરને કારણે કેટલાય લોકોએ જીવ ખોવાનો વારો આવ્યો છે. ત્યારે રાજકોટના જેતપુરમાં રખડતા ઢોરે વધુ એકનો ભોગ લીધો છે. જેતપુરમાં રખડતા ઢોરે અડફેટે લેતા 9 વર્ષના બાળકનું સારવાર દરમિયાન મોત નિપજ્યું છે. આ ઘટનાને પગલે સ્થાનિકો અને પરિવારજનોમાં વહીવટીતંત્ર સામે આક્રોશ જોવા મળી રહ્યો છે.