અરવલ્લી: ભારે વરસાદથી મેશ્વો બે કાંઠે થઈ, નદીની વચોવચ 14 લોકો ફસાયા

નદીની વચ્ચે બે પરિવારો ફસાયા
મોડાસાના જાલમપુર પાસેની મેશ્વો નદીમાં પાણીનું સ્તર વધતા 14 જેટલા લોકો ત્યાં ફસાઈ ગયા હતા. ભારે વરસાદને પગલે નદીના જળસ્તરમાં વધારો થયો હતો. પરિણામે નદીની પેલે પાર રહેતા બે પરિવારના 14 જેટલા લોકો ત્યાં જ ફસાઈ ગયા હતા. ઘટનાને પગલે SDRFની ટીમ રેસ્ક્યુ માટે સ્થળ પર પહોંચી ગઈ હતી. બીજી તરફ મોડાસાના મામલતદાર, પોલીસ, તેમજ ફાયર વિભાગની ટીમ પણ ઘટના સ્થળે પહોંચીને તમામ ફસાયેલા લોકોનું સુરક્ષિત રેસ્ક્યુ કરવા તજવીજ હાથ ધરી હતી.

સાબરકાંઠાના કાંકરેજમાં બે કલાકમાં દોઢ ઈંચ વરસાદ
નોંધનીય છે કે રાજ્યમાં હવામાન વિભાગની આગાહીને પગલે આજે પણ સાર્વત્રિક વરસાદ નોંધાયો હતો. જેમાં બનાસકાંઠાના કાંકરેજમાં બે કલાકમાં દોઢ ઇંચથી વધુ વરસાદ પડતા પાણી પાણી થઈ ગયું હતું. કાંકરેજના ખીમાણા બેંક ઓફ બરોડાની સામે પાણી ભરાતા લોકો ત્રાહિમામ પોકારી ઉઠ્યા હતા. ઘૂંટણ સમા પાણી ભરાવાથી સ્થાનિક લોકોમાં રોશ જોવા મળ્યો હતો. બીજી તરફ શિહોરી હાઇવે નાળાના સર્વિસ રોડ ઉપર ખાડાના કારણે વાહન પલટી ગયું હતું.

(વિથ ઈનપુટ: હિતેશ સુતરીયા)