ન કોઈ પુરાવા, ન કોઈ માહિતી… સુરતમાં 10 વર્ષની સગીરાને ઉઠાવી જઈ દુષ્કર્મ આચરનારો 24 કલાકમાં કેવી રીતે ઝડપાયો?

ઘર સામેથી સગીરાનું અપહરણ

સુરત ક્રાઈમ બ્રાન્ચના હાથે ઝડપાયેલા આ વ્યક્તિનું નામ જયસિંહ રામેશ્વર કુંભાર છે. આ એ જ વ્યક્તિ છે જેણે સુરતના પાંડેસરા વિસ્તારમાંથી પોતાના ઘરની સામે રમતી દસ વર્ષની બાળકીનું ઓટોમાં અપહરણ કર્યું હતું અને અપહરણ કર્યા બાદ તેને 10 થી 12 કિલોમીટર દૂર કડોદરા વિસ્તારમાં આવેલા તેના ઘરે લઈ ગયો હતો. ઘરે બાળકી પર બળાત્કાર ગુજાર્યા બાદ તેને ₹600 આપી, ઓટોમાં બેસાડી સુરત પરત મોકલી દીધી હતી. સુરત શહેરના કડીવાલા ચારરસ્તા પાસેથી બાળકી રડતી રડતી મળી આવી હતી. સુરત સિવિલ હોસ્પિટલમાં બાળકીનું મેડિકલ ચેકઅપ કરવામાં આવ્યું હતું, જેમાં તેની સાથે બળાત્કાર થયો હોવાની પુષ્ટિ થઈ હતી.

કેવી રીતે મળી આરોપીની જાણકારી?

સુરત પોલીસ આ કેસમાં આરોપીને શોધવામાં લાગી ગઈ હતી. જેમાં સુરત ક્રાઈમ બ્રાન્ચ પણ સામેલ હતી. સુરત ક્રાઈમ બ્રાન્ચની ટીમે સુરતના પાંડેસરા વિસ્તારમાંથી ગુમ થયેલી જે સ્થળેથી અને જ્યાં મળી આવી હતી ત્યાં સુધીના સીસીટીવી ફૂટેજની ચકાસણી કરવામાં આવી હતી અને હ્યુમન રિસોર્સની મદદ પણ લેવામાં આવી હતી. સુરત ક્રાઈમ બ્રાંચની ટીમને આ દુષ્કર્મ આચરનાર આરોપી જયસિંહ રામેશ્વર કુંભાર વિશે માહિતી મળતા જ પોલીસની ટીમ તેને પકડવા માટે શહેરથી 12 કિલોમીટર દૂર કડોદરા વિસ્તારમાં તુરંત પહોંચી ગઈ હતી.

3 સંતાનોનો પિતા હતો દુષ્કર્મનો આરોપી

સુરત ક્રાઈમ બ્રાન્ચે આ કેસનો ઉકેલ લાવવા માટે રાતભર મહેનત કર્યા બાદ શહેરથી દૂર કડોદરા વિસ્તારમાં આવેલી ટેક્સટાઈલ મિલમાં કામ કરતા આરોપી જયસિંહ રામેશ્વર કુંભારની ધરપકડ કરી છે. અપહરણ અને બળાત્કારના કેસની માહિતી આપતા સુરત ક્રાઈમ બ્રાંચના ડીપી રૂપલ સોલંકીએ જણાવ્યું હતું કે, ધરપકડ કરાયેલ જયસિંહ રામેશ્વર કુંભાર છેલ્લા વીસ વર્ષથી સુરતમાં રહે છે અને એક ટેકસટાઇલ મિલમાં નોકરી કરે છે. તે ત્રણ બાળકોનો પિતા છે. તે અવારનવાર સુરતના પાંડેસરા વિસ્તારમાં ફરવા આવતો હતો અને 23મીએ ફરવા આવ્યો ત્યારે તેણે 10 વર્ષની બાળકીનું અપહરણ કરી તેના ઘરે લઈ જઈ તેના પર બળાત્કાર ગુજાર્યો હતો. આરોપી જયસિંહ રામેશ્વર કુંભારે બળાત્કાર ગુજાર્યા બાદ યુવતીને 600 રૂપિયા આપી ઓટોમાં સુરત મોકલી દીધી હતી. પકડાયેલા આરોપીનો અન્ય કોઈ ગુનાહિત રેકોર્ડ હજુ સુધી સામે આવ્યો નથી. અપહરણ અને બળાત્કારનો આ બ્લાઇન્ડ મામલો ક્રાઈમ બ્રાન્ચ દ્વારા ટેકનિકલ સર્વેલન્સ અને હ્યુમન રીસોર્સ ના આધારે ઉકેલવામાં આવ્યો છે.

(સંજયસિંહ રાઠોડ, સુરત)