સુરતના જ્વેલર્સને પુષ્ય નક્ષત્ર પર ‘ચાંદી-ચાંદી’, સોનું મોંઘું થવા છતા ખરીદી માટે ભીડ જામી

દિવાળીનો તહેવાર નજીક આવી રહ્યો છે અને દિવાળી બાદ હવે લગ્નની સિઝન પણ આવી રહી છે. અને મહિલાઓ તહેવારો અને પ્રસંગોએ સોનાના ઘરેણાં પહેરવાનું પસંદ કરે છે. આવી સ્થિતિમાં, આ જ્વેલરી ખરીદવાનો શુભ સમય દિવાળી પહેલા આવતા પુષ્ય નક્ષત્રનો દિવસ છે. ખરીદી કરવા માટે લોકોની આ ભીડ મોડી રાત સુધી ઝવેરીઓ પર જોવા મળી હતી. સુરતના જ્વેલર્સના શોરૂમમાં એટલી ભીડ હતી કે લોકો ઘરેણાં ખરીદવાની રાહ જોઈને ઉભા હતા. જ્વેલર્સે જ્વેલરી પર સ્પેશિયલ ઑફર્સ સાથે જ્વેલરીની નવી ડિઝાઇન પણ બનાવી હતી.

જ્વેલરીના એડવાન્સ બુકિંગમાં 20-25 ટકાનો વધારો

પુષ્ય નક્ષત્રનો દિવસ આ વર્ષે પણ જ્વેલર્સ માટે તેજી લઈને આવ્યો છે. ગત વર્ષની સરખામણીમાં આ વર્ષે સોનાના ભાવમાં વધારો થયો હોવા છતાં આ પુષ્ય નક્ષત્રના દિવસે ઘરેણાંની ખરીદીમાં પણ વધારો જોવા મળ્યો છે. એટલું જ નહીં પરંતુ ગત વર્ષની સરખામણીએ જ્વેલરીના એડવાન્સ બુકિંગમાં 20 થી 25 ટકાનો વધારો થયો હોવાનું સુરતના જ્વેલર્સ જણાવી રહ્યા છે.

જ્વેલર્સની દુકાનો પર બપોરે પણ ભીડ જામી

પુષ્ય નક્ષત્રના દિવસે સારા મુહૂર્ત જોવા બપોરના સમયે જ્વેલર્સની દુકાનો પર ભીડ જોવા મળી હતી. અહીં લોકોની ભીડ જોઈને અંદાજો લગાવી શકાય છે કે સોનાના ભાવમાં ભલે મંદી હોય કે વધારો થાય, પરંતુ સુરતમાં દિવાળીના તહેવાર અને ખાસ કરીને પુષ્ય નક્ષત્ર પર તેની કોઈ ખાસ અસર જોવા મળી નથી.