Kinjal Dave: સિવિલ કોર્ટે લોકગાયિકા કિંજલ દવેને ફટકાર્યો રૂ.1 લાખનો દંડ, જાણો શું છે સમગ્ર મામલો

Ahmedabad News: લોકગાયિકા કિંજલ દવેની મુશ્કેલીમાં વધારો થયો છે. પ્રખ્યાત “ચાર ચાર બંગડી વાળી ઓડી” ગીતને લઈને સિવિલ કોર્ટે કિંજલ દવેને દંડ ફટકાર્યો છે. લોકગાયિકા કિંજલ દવેને કોઈ અન્યના ગીત અને શબ્દો વાપરવા બદલા આ દંડ ફટકારવામાં આવ્યો છે. કોર્ટે કિંજલ દવેને 7 દિવસની અંદર 1 લાખ રૂપિયા અરજદારને ચૂકવવાનો નિર્દેશ આપ્યો છે.

સમગ્ર મામલે વિગતવાર વાત કરીએ તો લોકગાયિકા કિંજલ દવે ગાયેલું “ચાર ચાર બંગડી વાળી ઓડી” ગીત 20 ડિસેમ્બર 2016ના રોજ  RDC ગુજરાતીની યુટ્યુબ ચેનલ પર અપલોડ કરાયું હતું. જે ખૂબ જ લોકપ્રિય બની ગયું હતું. જે બાદ વર્ષ 2017માં રેડ રિબિન એન્ટરટેઇનમેન્ટ પ્રાઇવેટ લિમિટેડે કહ્યું હતું કે ઓસ્ટ્રેલિયાના કાર્તિક પટેલે આ ગીતની સંકલ્પના નવેમ્બર 2015માં કરી હતી. તેઓએ કાઠિયાવાડી કિંગ્સ નામની યુટ્યુબ ચેનલ પર 29 સપ્ટેમ્બર 2016ના રોજ આ ગીતને અપલોડ કર્યું હતું. એટલે કે કાર્તિક પટેલનું ગીતના કિંજલ દવેએ પોતાના શબ્દોમાં ગાયું હતું.

જે બાદ કાર્તિક પટેલે આ મામલે કોર્ટનો દરવાજો ખખડાવ્યો હતો. જે બાદ કોર્ટે કિંજલ દવેને આ ગીત જાહેર કાર્યક્રમમાં ન ગાવાની સૂચના આપી હતી. કોર્ટના આ આદેશ સામે કિંજલ દવે ગુજરાત હાઈકોર્ટમાં પહોંચ્યા હતા. તેઓ એક અરજી કરીને કોર્ટના આદેશને ગુજરાત હાઈકોર્ટમાં પડકાર્યો હતો. જે બાદ વર્ષ 2019માં ગુજરાત હાઈકોર્ટે કિંજલ દવેને આ ગીત જાહેર કાર્યક્રમમાં ગાવાની છૂટ આપી હતી.

“ચાર ચાર બંગડી વાળી ઓડી” ગીત કોપીરાઈટ કેસમાં સપડાતા કિંજલ દવેએ કોર્ટમાં આ મામલે માફી માંગી હતી. જોકે, કોર્ટે તેમની માફી સ્વીકારી ન હતી. કોર્ટે કહ્યું હતું કે, કિંજલ દવેએ હજારો લોકો સામે આ ગીત ગાયું છે અને પૈસા કમાવ્યા છે માટે માફી યોગ્ય નથી. જે બાદ કોર્ટે આ મામલે આકરું વલણ અપનાવતા કિંજલ દવેને 7 દિવસની અંદર 1 લાખ રૂપિયા અરજદારને ચૂકવવાનો નિર્દેશ આપ્યો છે.