ટોલ ટેક્સ, LPG અને સોનું… તમારા ખિસ્સાને અસર કરનારા આ 7 મોટા ફેરફારો આજથી લાગુ થશે

1. કોમર્શિયલ એલપીજી સસ્તું થયું
આજથી એલપીજી સિલિન્ડરના ભાવમાં ફેરફાર કરવામાં આવ્યો છે. 19 કિલોના કોમર્શિયલ એલપીજી સિલિન્ડરની કિંમતમાં 91.50 રૂપિયાનો ઘટાડો કરવામાં આવ્યો છે. દિલ્હીમાં 19 કિલોના કોમર્શિયલ સિલિન્ડરની નવી કિંમત 2,028 રૂપિયા હશે. જોકે, ઘરેલુ રાંધણ ગેસના ભાવમાં કોઈ ફેરફાર કરવામાં આવ્યો નથી. પેટ્રોલિયમ કંપનીઓ દર મહિનાની પહેલી તારીખે એલપીજી સિલિન્ડરના ભાવમાં ફેરફાર કરે છે.

2. નવી ટેક્સ વ્યવસ્થા દેશમાં
1 એપ્રિલથી એટલે કે આજથી નવી આવકવેરા વ્યવસ્થાના નવા સ્લેબ લાગુ કરવામાં આવ્યા છે. સરકારે સામાન્ય બજેટ 2023માં નવા સ્લેબની જાહેરાત કરી હતી, જેમાં સ્લેબની સંખ્યા 6થી ઘટાડીને પાંચ કરવામાં આવી હતી. સરકારે કહ્યું છે કે નવી ટેક્સ વ્યવસ્થા ડિફોલ્ટ હશે. જો કોઈ જૂની વ્યવસ્થાને પસંદ કરવા માંગે છે, તો તેણે આ માટે ફોર્મ ભરવાનું રહેશે.

3. 7 લાખ રૂપિયા સુધીની આવક આજથી ટેક્સ ફ્રી
આજથી આવકવેરા મુક્તિ મર્યાદા 5 લાખ રૂપિયાથી વધારીને 7 લાખ રૂપિયા કરવામાં આવી છે. જો કે, આ લાભ એવા લોકોને મળશે જેઓ નવી કર વ્યવસ્થા પસંદ કરશે. નવી કર વ્યવસ્થામાં, આવકવેરા કાયદાની કલમ 87A હેઠળ કર મુક્તિ 12,500 રૂપિયાથી વધારીને 25,000 રૂપિયા કરવામાં આવી છે. જો કે, આના હેઠળ, જેઓ રૂ. 7 લાખ સુધીની આવક પર શૂન્ય ટેક્સનો લાભ લે છે તેમને 80C.4 હેઠળ મુક્તિનો લાભ નહીં મળે.

4. એક્સપ્રેસ વે પર મુસાફરી કરવી મોંઘી થશે
દેશના હાઈવે અને એક્સપ્રેસ-વે પર 1 એપ્રિલથી મુસાફરી કરવી મોંઘી થઈ શકે છે. આજથી દિલ્હી મેરઠ એક્સપ્રેસવે અને NH-9 પર ટોલ ટેક્સમાં લગભગ 10 ટકાનો વધારો કરવામાં આવ્યો છે. મુંબઈ-પુણે એક્સપ્રેસ વે પર ટોલના દરમાં વધારો કરવાની પણ જાહેરાત કરવામાં આવી છે. હવે આ એક્સપ્રેસ વે પર મુસાફરી કરવા માટે 18 ટકા વધુ ટોલ ચૂકવવો પડશે. અમદાવાદ-વડોદરા એક્સપ્રેસ-વે પરના ટોલ ટેક્સમાં પણ રૂ.10નો વધારો કરવામાં આવ્યો છે. ટોલ ટેક્સ દરેક નાણાકીય વર્ષની શરૂઆતમાં સુધારવામાં આવે છે.

5. જ્વેલરી પર હોલમાર્કિંગ ફરજિયાત
1લી એપ્રિલ 2023થી એટલે કે આજથી સોનાના દાગીના પર હોલમાર્કિંગ ફરજિયાત કરવામાં આવ્યું છે. આજથી માત્ર 6 અંકનું આલ્ફાન્યૂમેરિક હોલમાર્કિંગ માન્ય રહેશે. 4 અંકના હોલમાર્ક યુનિક આઇડેન્ટિફિકેશનવાળી જ્વેલરી હવે વેચવામાં આવશે નહીં.

6. નાની બચત યોજનાના વ્યાજ દરોમાં વધારો
1 એપ્રિલ, 2023 થી, નાની બચતમાં રોકાણ કરનારાઓને થાપણો પર વધુ વ્યાજ મળશે. સરકારે એપ્રિલ-જૂન 2023 ક્વાર્ટર માટે વ્યાજ દરમાં વધારો કર્યો છે. નાની બચત યોજનાઓ પરના વ્યાજ દરમાં 70 બેસિસ પોઈન્ટ્સ (BPS)નો વધારો કરવામાં આવ્યો છે. નાણા મંત્રાલય દ્વારા જારી કરાયેલા નોટિફિકેશનમાં કહેવામાં આવ્યું છે કે વરિષ્ઠ નાગરિક યોજના, માસિક આવક યોજના, રાષ્ટ્રીય બચત પ્રમાણપત્ર, કિસાન વિકાસ પત્ર અને સુકન્યા સમૃદ્ધિ યોજના જેવી યોજનાઓના વ્યાજ દરમાં વધારો કરવામાં આવ્યો છે.

7. મ્યુચ્યુઅલ ફંડમાં ફેરફાર
નવા નાણાંકીય વર્ષ એટલે કે 1લી એપ્રિલથી મ્યુચ્યુઅલ ફંડ્સમાં કરાયેલા શોર્ટ ટર્મ કેપિટલ ગેન્સ અંતર્ગત ટેક્સ લાગશે. સરકારે લાંબા ગાળાના કેપિટલ ગેન્સને નાબૂદ કર્યો છે. જો કોઈ વ્યક્તિ ડેટ મ્યુચ્યુઅલ ફંડને 36 મહિના પહેલાં રિડીમ કર્યા પછી યુનિટ્સ વેચે છે, તો નફા પર ટૂંકા ગાળાના કેપિટલ ગેન્સ તરીકે ટેક્સ લાગે છે. પરંતુ 36 મહિનાથી વધુ સમય સુધી હોલ્ડિંગ કર્યા પછી, યુનિટ્સના વેચાણ પર લાંબા ગાળાના કેપિટલ ગેન્સ ટેક્સ વસૂલવામાં આવે છે.