કેન્દ્ર સરકાર IDBI બેંકમાં 51%થી વધુ ભાગ વેચશે, ડીલ ફાઈનલ કરવા મંત્રીઓની કમિટિ નિર્ણય લેશે

બ્લૂમબર્ગે સૂત્રોને ટાંકીને જણાવ્યું હતું કે ડીલની પ્રકૃતિ અંગે અંતિમ નિર્ણય મંત્રીઓની સમિતિ લેશે. સરકાર અને LIC સપ્ટેમ્બરના અંત સુધીમાં બેંકમાં ખરીદદારોના હિતનું મૂલ્યાંકન કરશે. ગયા વર્ષે મે મહિનામાં, આર્થિક બાબતોની કેબિનેટ સમિતિએ IDBI બેન્કના વ્યૂહાત્મક ડિસઇન્વેસ્ટમેન્ટ અને મેનેજમેન્ટ કંટ્રોલના ટ્રાન્સફર માટે સૈદ્ધાંતિક મંજૂરી આપી હતી. આ માટે IDBI બેંક એક્ટમાં જરૂરી સુધારા કરવામાં આવ્યા છે. સરકાર આ બેંકમાં 45.48 ટકા હિસ્સો ધરાવે છે, જ્યારે LIC 49.24 ટકા હિસ્સો ધરાવે છે. જ્યારે નાણા મંત્રાલય અને IDBI બેંકના અધિકારીઓએ ટિપ્પણી કરવાનો ઇનકાર કર્યો હતો, LICએ તેના પર ટિપ્પણી કરી ન હતી.

427.7 અબજનું માર્કેટ કેપિટલાઇઝેશન
IDBI બેન્કના શેરમાં છેલ્લા 12 મહિનામાં 6.3 ટકાનો વધારો થયો છે. આનાથી બેંકની માર્કેટ મૂડી વધીને 427.7 અબજ રૂપિયા થઈ ગઈ છે. બુધવાર, 24 ઓગસ્ટે, BSE પર દિવસના ટ્રેડિંગમાં બેન્કનો શેર લગભગ 5 ટકા વધીને રૂ. 41 થયો હતો. છેલ્લે 2.82 ટકાના વધારા સાથે રૂ. 40.10 પર બંધ રહ્યો હતો.

સરકાર મેનેજમેન્ટ કંટ્રોલ સોંપી શકે
સરકાર હાલમાં આઈડીબીઆઈ બેંકનો પોતાનો અને એલઆઈસીનો ઓછામાં ઓછો અમુક હિસ્સો વેચવાની સાથે મેનેજમેન્ટ કંટ્રોલ સોંપવાની પ્રક્રિયામાં છે. બ્લૂમબર્ગના જણાવ્યા અનુસાર, RBI રોકાણકારોને 40 ટકાથી વધુ હિસ્સો ખરીદવાની મંજૂરી આપશે. સેન્ટ્રલ બેંકના કાર્યક્ષેત્રમાં કાર્યરત કંપનીઓએ નિયત મર્યાદા કરતાં વધુ હિસ્સો ખરીદવા માટે પરવાનગી લેવી પડશે. તેના કાર્યક્ષેત્રની બહારની કંપનીઓ માત્ર 10-15 ટકા હિસ્સો ખરીદી શકે છે.

• આ મર્યાદામાં છૂટછાટ સંભવિત ખરીદદારોની સંખ્યામાં વધારો કરી શકે છે. આ સરકારની ખાનગીકરણ યોજનાને વેગ આપી શકે છે.
• સરકારે આ વર્ષે રૂ. 65,000 કરોડનું ડિસઇન્વેસ્ટમેન્ટ લક્ષ્ય નક્કી કર્યું છે. તેમાંથી એક તૃતીયાંશ એલઆઈસીના આઈપીઓમાંથી ઊભા થયા છે.