આ મહાન બોલરના 21 વર્ષના ટેસ્ટ કરિયરનો અંત થયો, પોતાના નામે કર્યા મોટા રેકોર્ડ

James Anderson Retire : ઈંગ્લેન્ડના ફાસ્ટ બોલર જેમ્સ એન્ડરસને શુક્રવારે પોતાના ટેસ્ટ કરિયરની છેલ્લી મેચ રમી હતી. વિશ્વના મહાન બોલર જેમ્સ એન્ડરસને વેસ્ટ ઈન્ડિઝ સામે તેની કારકિર્દીની છેલ્લી અને 188મી ટેસ્ટ મેચમાં કુલ ચાર વિકેટ ઝડપી હતી અને આ ફોર્મેટમાં 704 વિકેટ સાથે તેની કારકિર્દીનો અંત કર્યો હતો. એન્ડરસન (41 વર્ષ) એ 188 ટેસ્ટમાં કુલ 704 વિકેટ લીધી છે અને 32 વખત પાંચ વિકેટ લેવાની સિદ્ધિ હાંસલ કરી છે. લોર્ડ્સમાં ત્રણ મેચની શ્રેણીની પ્રથમ ટેસ્ટમાં ઈંગ્લેન્ડે વેસ્ટ ઈન્ડિઝને એક ઈનિંગ અને 114 રનથી હરાવ્યું હતું. જેમ્સ એન્ડરસને તેની કારકિર્દી લોર્ડ્સમાં શરૂ કરી હતી અને 21 વર્ષ બાદ આજે તેણે તે જ સ્થળે તેનો અંત કર્યો હતો.

જેમ્સ એન્ડરસન પાસે ટેસ્ટ ક્રિકેટના તેના છેલ્લા બોલ પર વિકેટ લેવાની અને પાંચ વિકેટ ઝડપવાની તક હતી. જોકે, 44મી ઓવર દરમિયાન તેણે કેચ એન્ડ બોલની તક ગુમાવી દીધી હતી. જેમ્સ એન્ડરસને વેસ્ટ ઈન્ડિઝ સામેની તેની છેલ્લી ટેસ્ટ મેચની પ્રથમ ઈનિંગમાં એક અને બીજી ઈનિંગમાં ત્રણ વિકેટ ઝડપી હતી.

ટેસ્ટ ક્રિકેટમાં જેમ્સ એન્ડરસનના કેટલાક ટોચના રેકોર્ડ નીચે મુજબ છે-

સૌથી વધુ વિકેટ લેનાર ઝડપી બોલર : જેમ્સ એન્ડરસન ટેસ્ટમાં સૌથી વધુ વિકેટ લેનાર ઝડપી બોલર છે. તેણે 188 ટેસ્ટ મેચમાં 704 વિકેટ લીધી છે. જેમ્સનો પાર્ટનર સ્ટુઅર્ટ બ્રોડ એકમાત્ર ઝડપી બોલર હતો જેણે 604 ટેસ્ટ વિકેટ લીધી હતી.

સચિન પછી સૌથી વધુ ટેસ્ટ રમ્યો : જેમ્સ એન્ડરસને તેની ટેસ્ટ કારકિર્દીમાં કુલ 188 મેચ રમી હતી. આવું કરનાર તે વિશ્વનો બીજો ખેલાડી છે. તેમના પહેલા ભારતના મહાન બેટ્સમેન સચિન તેંડુલકરે 200 ટેસ્ટ રમી હતી.

પાંચ વિકેટ હોલ : ઈંગ્લેન્ડના ઝડપી બોલર જેમ્સ એન્ડરસને તેની ટેસ્ટ કારકિર્દી દરમિયાન કુલ 32 પાંચ વિકેટ ઝડપી છે. તે ટેસ્ટ ક્રિકેટના ઈતિહાસમાં સૌથી વધુ પાંચ વિકેટ ઝડપનાર છઠ્ઠો બોલર છે. મુથૈયા મુરલીધરને આ સિદ્ધિ સૌથી વધુ 67 વખત હાંસલ કરી છે, ત્યારબાદ રિચર્ડ હેડલી (36), અનિલ કુંબલે (35), આર અશ્વિન (36) અને રંગના હેરાથ (34) છે. ઈંગ્લેન્ડના બોલર એન્ડરસનના નામે પણ ત્રણ વખત 10 વિકેટ લેવાનો રેકોર્ડ છે.

ટેસ્ટ ક્રિકેટમાં સૌથી વધુ બોલ ફેંકનાર ચોથો બોલર : ટેસ્ટ ક્રિકેટના ઈતિહાસમાં સૌથી વધુ બોલ ફેંકવાનો રેકોર્ડ મુરલીધરનના નામે છે. તેણે ટેસ્ટ ક્રિકેટમાં 44039 બોલ ફેંક્યા છે. અનિલ કુંબલે 40850 બોલ સાથે બીજા ક્રમે છે, શેન વોર્ને 40705 બોલ અને જેમ્સ એન્ડરસને 40037 બોલ ફેંક્યા છે.