મહારાષ્ટ્રમાં માલગાડી અને પેસેન્જર ટ્રેન વચ્ચે ગંભીર અકસ્માત, 50 યાત્રીઓ ઈજાગ્રસ્ત

મહારાષ્ટ્રઃ ગોંદિયામાં પેસેન્જર ટ્રેન અને માલગાડી વચ્ચે ગંભીર અકસ્માત થયો છે. એક પેસેન્જર ટ્રેને માલગાડીને જોરદાર ટક્કર મારી દીધી હતી. જેના પરિણામે આ દુર્ઘટનામાં 3 ટ્રેનના ડબ્બા ટ્રેક પરથી નીચે પટકાઈ ગયા હતા. પ્રાથમિક માહિતી પ્રમાણે આ દુર્ઘટનામાં 50થી વધુ પેસેન્જરોને ઈજા પહોંચી છે.

રાજસ્થાન જતી ટ્રેનનો અકસ્માત
મંગળવારે મોડી રાત્રે લગભગ અઢી વાગ્યે એક ટ્રેનના 3 ડબ્બા ટ્રેક પરથી અચાનક ઉતરી ગયા હતા. જેમાં 50થી વધુ પેસેન્જરો હતા. ઉલ્લેખનીય છે કે આ દરમિયાન દરેકને ઈજા પહોંચી છે પરંતુ રાહતની વાત એ છે કે કોઈનું મોત નીપજ્યું નથી. આ દુર્ઘટનાગ્રસ્ત ટ્રેન છત્તીસગઢથી બિલાસપુર અને ત્યાંથી રાજસ્થાનના જોધપુર જઈ રહી હતી.

પાછળથી ટ્રેને મારી જોરદાર ટક્કર
આ અકસ્માતમાં ઈજાગ્રસ્ત પેસેન્જરોને ગોદિયા જિલ્લાની સરકારી અને પ્રાઈવેટ હોસ્પિટલમાં સારવાર અર્થે ખસેડી દેવામાં આવ્યા છે. આ ઘટના મોડી રાત્રે ઘટી હતી. જેમાં બંને ટ્રેન એક જ દિશામાં જઈ રહી હતી. આ દરમિયાન ભગત કી કોઠી નામની ટ્રેનને ગ્રિન સિગ્નલ મળ્યા પછી તે આગળ વધી હતી, તો બીજી બાજુ ગોંદિયા શહેરથી પહેલા માલગાડીને કોઈપણ સિગ્નલ ન મળતા ત્યાં જ થંભી ગઈ હતી. જેના કારણે ભગત કી કોઠી ટ્રેનને તેને પાછળથી જોરદાર ટક્કર મારી દીધી હતી.