સરકાર કાર્યવાહી કરે, નહી તો અમે કાર્યવાહીના આદેશ આપીશું: સુપ્રીમે સરકારની ઝાટકણી કાઢી

નવી દિલ્હી : સુપ્રીમ કોર્ટે કેન્દ્ર સરકાર અને મણિપુર સરકારને આ ઘટના માટે જવાબદારો સામે કરવામાં આવેલી કાર્યવાહી અંગે કોર્ટને જાણ કરવા નિર્દેશ આપ્યો હતો. સુપ્રીમ કોર્ટે મણિપુરમાં બે મહિલાઓની નગ્ન પરેડના મામલાની પણ નોંધ લીધી છે. મુખ્ય ન્યાયાધીશ ડીવાય ચંદ્રચુડે કહ્યું કે, મણિપુરમાં મહિલાઓ સાથે જે થયું તે સંપૂર્ણપણે અસ્વીકાર્ય છે. સરકારે આ અંગે તાત્કાલિક પગલાં લેવા જોઈએ. કોર્ટે કહ્યું કે જો સરકાર આના પર કાર્યવાહી નહીં કરે તો અમે કરીશું. સુપ્રીમ કોર્ટે કહ્યું કે, સાંપ્રદાયિક સંઘર્ષના ક્ષેત્રમાં મહિલાઓનો ઉપયોગ એ બંધારણનું ઉલ્લંઘન છે. તેમણે કહ્યું કે જે ઘટનાનો વીડિયો વાયરલ થઈ રહ્યો છે તે ખૂબ જ પરેશાન કરનારો છે.

CJI ચંદ્રચુડ, જસ્ટિસ પીએસ નરસિમ્હા અને જસ્ટિસ મનોજ મિશ્રાની બેન્ચે કહ્યું કે, અમે સરકારને થોડો સમય આપી રહ્યા છીએ. જો જમીન પર આગળ કંઈ કાર્યવાહી નહીં થાય, તો અમે જાતે જ પગલાં લઈશું. સુપ્રીમ કોર્ટે કેન્દ્ર સરકાર અને મણિપુર સરકારને આ ઘટના માટે જવાબદારો સામે કરવામાં આવેલી કાર્યવાહી વિશે કોર્ટને જાણ કરવા નિર્દેશ આપ્યો હતો. આ ઘટના અને આ હિંસા વચ્ચે મહિલાઓનો ઉપયોગ વિશે મીડિયામાં જે પણ બતાવવામાં આવ્યું છે તે બંધારણીય લોકશાહીની ભાવનાની વિરુદ્ધ છે.

કેન્દ્ર સરકાર અને રાજ્ય સરકારે આ અંગેના તમામ પગલાઓની માહિતી આપવી જોઈએ. CJIએ આ મામલાની સુનાવણી આગામી શુક્રવાર સુધી મુલતવી રાખી છે. 4 મેની ઘટના ખરેખર તો મણિપુર આ દિવસોમાં વંશીય હિંસાઓની ઝપેટમાં છે, પરંતુ હવે મણિપુરના પહાડી વિસ્તારોમાં એક વીડિયોને લઈને તણાવ ફેલાઈ ગયો છે. જેમાં બે મહિલાઓને કપડાં ઉતારવામાં આવ્યા હતા. નગ્ન કરીને ફેરવવામાં આવે છે.

અહેવાલો અનુસાર વીડિયો 4 મેનો છે અને બંને મહિલાઓ કુકી સમુદાયની છે. જ્યારે મહિલાઓને નગ્ન કરીને પરેડ કરી રહેલા પુરૂષો તમામ મેઇતેઈ સમુદાયના છે. આદિવાસી સંગઠન ઈન્ડીજીનસ ટ્રાઈબલ લીડર્સ ફોરમે ગુનેગારો સામે કાર્યવાહીની માંગ કરી છે. બળાત્કાર અને હત્યાનો કેસ નોંધાયો પોલીસે જણાવ્યું કે થૌબલ જિલ્લાના નોંગપોક સેકમાઈ પોલીસ સ્ટેશનમાં અજાણ્યા સશસ્ત્ર બળાત્કારીઓ વિરુદ્ધ અપહરણ, સામૂહિક બળાત્કાર અને હત્યાનો કેસ નોંધવામાં આવ્યો છે.