‘મારા કારણે નરેન્દ્ર મોદીની પ્રતિભાને…’ કિરણ પટેલ મુદ્દે જાણો બીજું શું બોલ્યા BJP નેતા

ગાંધીનગરઃ કશ્મીરમાં Z+ સિક્યુરિટી સાથે વીવીઆઈપી સુવિધાઓ અને રુઆબ ભોગવતા પ્રધાનમંત્રી કાર્યાલયના અધિકારી તરીકેની ઓળખ આપનારો મહાઠગ કિરણ પટેલ અને ગુજરાત ભાજપના નેતા અમિત પંડ્યા કે જેઓના પિતા પણ ગુજરાત ભાજપમાં આગવું નામ ધરાવે છે તેમના પર સતત આક્ષેપો થઈ રહ્યા છે. કિરણ પટેલના વહીવટદાર તરીકેને ભૂમિકા અમિત પંડયા દ્વારા ભજવવામાં આવી રહી હોવાના સતત આરોપો વચ્ચે તેના પિતા હિતેશ પંડ્યા દ્વારા મુખ્યમંત્રી કાર્યાલયમાં પીઆરઓ તરીકેની જવાબદારીઓમાંથી રાજીનામુ આપી દેવામાં આવ્યું છે. ખુદ હિતેશ પંડ્યા પર પણ આવી જ રીતે કિરણ પટેલની સાથેની સંડોવણીના આરોપો લાગવા લાગ્યા હતા. જે પછી તેમણે રાજીનામુ આપી દીધું છે. નરેન્દ્ર મોદીની છબી પર તેની અસર થતી હોવાનું કારણ આપીને તેમણે રાજીનામુ આપ્યું છે. જોકે જ્યારે પણ મીડિયા દ્વારા કિરણ પટેલ અને તેમના પરિવારજનોના સંબંધો અંગે મીડિયા દ્વારા પુછવામાં આવ્યું ત્યારે તેમણે મેટર કોર્ટમાં છે હું કાંઈ કહી ન શકું તેવી ઢાલ ઊભી કરીને સવાલોથી છૂટકારો મેળવવાના પ્રયત્નો કર્યા છે. જોકે તેમના સવાલોથી ભાગી જવાને કારણે સવાલો ઊભા થતા નથી તેવું નથી તે સતત જનતા વચ્ચે ચર્ચામાં રહે છે.