ભાવનગરમાં કળિયુગી દીકરાએ જમવા જેવી નજીવી વાતે બેટના ફટકા મારી માતાની હત્યા કરી નાખી

જમવા બાબતે બોલાચાલી થતા માતાને બેટ માર્યું

વિગતો મુજબ, ભાવનગરના તળાજામાં જૂની પોલીસ લાઈન તળાજી નદીના કાંઠે રહેતા રેખાબેન પંડ્યા ટ્રેઝરી ઓફિસમાં ક્લાર્ક તરીકે ફરજ બજાવતા હતા. મંગળવારે બપોરે મોટો દીકરો મિતેશ પંડ્યા બપોરે જમવા માટે આવ્યો હતો, દરમિયાન જમવા બાબતે બોલાચાલી થતા આવેશમાં આવીને મિતેશે ક્રિકેટ રમવાના બેટ વડે માથા અને શરીર પર ફટકા માર્યા હતા. જેથી રેખાબેનને લોહી નીકળતા તેઓ નીચે ઢળી પડ્યા હતા. આ બાદ મિતેશે નાના ભાઈને ફોન કરીને કહ્યું કે, મમ્મી પડી ગયા છે, તુ જલ્દી ઘરે આવ. આ બાદ 108 એમ્બ્યુલન્સમાં મહિલાને હોસ્પિટલ ખસેડવામાં આવ્યા અહીં તેમને તબીબોએ મૃત જાહેર કર્યા હતા.

પોલીસ તપાસમાં ખૂલ્યો દીકરાનો કાંડ

ઘટનાની જાણ થતા જ પોલીસનો કાફલો હોસ્પિટલ દોડી આવ્યો હતો અને મૃતકના પોસ્ટ મોર્ટમ માટે ખસેડ્યો હતો. દરમિયાન પોલીસ તપાસમાં પુત્રએ જ માતાની હત્યા કરી હોવાનું ખૂલતા નાનાભાઈ નિતેશે તળાજા પોલીસ સ્ટેશનમાં મોટાભાઈ મિતેશ વિરુદ્ધ ફરિયાદ નોંધાવી હતી.

(ઈનપુટ: નીતિન ગોહિલ)